Ka Hill State People’s Democratic Party (HSPDP) u pteiñ ko wow yakhun ya ki phang ka jaitbru wow dawa ya ka Khasi-Jaiñtia State deiwa pynyakhlaad lok noh wa ki Garo.
U President ka HSPDP, u KP Pangniang hawa klam ynne ka sngi, da ong u wa i yakhun ym pu blaad i yow yoh ya ka jylla yong i hi wei da ong u wa kiwi ki jylla kam ka Mizoram, ka Sikkim, ka Goa toh kiwa rap khian bar ya u pood ka Khasi-Jaiñtia.
Da khana u ha kini ki sngi wow wan daw em i yachem wa ki lok na Garo Hills kiwa em ini i jooh i kwah wei wow pynkhlan chooh yei yakhih wow dawa da jar jiar ki jylla hapyrdi ka Khasi-Jaiñtia wa Garo.
Heijooh i por, u Pangiang da ong u wa hanla dadep e ki dei thoh cha ka sorkar India hajrong ini tangwa neiliang ka sorkar pyrdi ym pu em e ko yei jubab iyi iyi næ i thoh hajrong ini.
Katkam i ong u President ka HSPDP, da em i ya krehlang waka Garoland State Movement Committee waka HSPDP yow pynjoor yei dawa ya jar jiar ka jylla.
U Pangniang da khana u leh wa ha Garo Hills da em leh ki seiñbhalang kiwa dawa ya ka jylla ki Garo wa kamjooh ha Khasi wa Jaiñtia Hills wa em boon ki seiñbhalang kiwa em i jooh ka yurim kamwa yieñ ka HSPDP.
Discussion about this post