Jowai: “Yoosuk u pait heini wa hadooh katni dang neh dang im iwa yah kiwa rim wa jah ya i, iwa pynmahajon ya ka jaitbru wa ka chnong ka thaw waroh kawi.” Da ong u Chairman ka JHADC u A.H. Darnei heipor wa wan wai u ya ka Nohsakyriat ka Raij Ialong kawa da pynman ynne ka sngi ha Madan Langdoh, Ialong, West Jaiñtia Hills.
Da pynkynmoo u leh wa ka Council da jooh pyrkhat wei da yaklam ko hei wow pynneh ya ki dustur riti wa ha rukom wa em hapoh ri-loom Jaiñtia heiwa da chim ya ka rai wow booh noh da kawi ka tnat wa tip kam ka Arts and Culture wow pynneh ya kini waroh.
Ha kani ka sngi da em ka yalang heiwa da wan sakhi da ka BDO ka Thadlaskeiñ ka B.Blah, u Dolloi ka Elaka Jowai u Puramon Kyning, u MLA warim ka Jowai u Sing Mulieh, wa kiwi kiwi ki khon ka Raij Ialong wa kiwa wan na kylleiñ ka ri-loom Jaiñtia.
U Puramon hei klam yong oo da ong u wa ka Nohsakyriat toh ka por wow pynyoo rong ya ki rukom leh sñiawbha ki Pnar hachwa wow hiar ki cha ki hali ki pynthor. Da ong u leh wa yoosuk u yoo wa kat dang mih ki snem kani ka Nohsakyriat dang phooh ko.
Ha kani ka sngi ki kynthai khynnah wa waheh da yachimbynta chongchit ki wow chong ha ki sakyriat wada pynkhreh ha kani ka madan ya kiwa da tah da ki dieñ wei da pynskit ya ki wah-wah neiñ-neiñ heiwa da booh ya ar jait ki sakyriat neibynta kiwa heh wa kiwa dang khian.
Da yoh u sakhi leh wa ki kynthai wa riam ha ki riam tynre kam ki muka wa ki thohsaru da yaknieh ki wow chong ha ki sakyriat kiwa da booh ha kani ka madan iwa da pynbor ya kiwa pyllai wow phah yang ki ya ki jar jiar ki bhah.
Ka Nohsakyriat man ko kam ka por wow engooh ya ki Blai ki Syiem wa ya ka Bei Rymaw wow kyrkhu kyrdoh ko ya ki khon ka Raij heipor wa hiar bet ki yow bha u miat u kba wa ki soh ki pe.
Mynstep ka sngi nawon daw pynman won sa ya ka Chaad Sukra ka Raij ha kani ka jooh ka Madan nadooh i por 1:00 i sngi.
Discussion about this post