theme-sticky-logo-alt
theme-logo-alt
Advertisement ad1
Advertisement ad1

Ka parom shaphang ka Kya Laisnem ha Labang

Advertisement ad1
Advertisement ad1

Da: U Chandame Sungoh

Hashwa ba ngin poi shaka parom to ngin ïapeit ïaki jingmut jong kine ki artylli ki kyntien kiba don hakane ka parom kita ki long “Kya” bad “Laisnem”.

Ka Kya ka dei ka jait dieng kaba bun sha kane ka thaiñ bad kiba kham paw nakine ki long ka Kya Chaweit, Kya Mookhyrwang, Kya Umchken kine ki kya te ki long kiba heh bad ki diengbah diengsan kiba la i triem ban peit kiba im daki spah spah snem bad dangneh dangsah haduh mynta.

Kine ki jait dieng ki long ki jait diengbah diengsan kiba beit bad jrong bha kham niar ba phin ïoh-i ïa kiba kdor ne lyngkot. Ki sla jong ki don san san tylli ki sla ha i wei i tang ba syriem thik kum ka sla phan dieng. Ka don ïaki soh kiba heh kum ka kait bad long thik kum u kynphad (Cotton) bad uba bha ruh ban shna syngkhlieh ne tusok bad ban thir ksai. Haka por ba ki dang long dienglung te la sop daki shyiah kiba eh bad kiba nep baroh shi rynieng bad kine ki shyiah ki sa hap suki pa suki ynda kila heh la slem bad ïaw ka rta. Wat laki long ki diengbah diengsan ruh ki long pat ki jait dieng kiba jem kumta kim long kiba bit ban pyndonkam ha kaba shna jingshna hynrei la ong ba ki juh pyndonkam haka ba shna Plywood bad shna jingpruid.

Ka ktien Laisnem pat kamut ka jingïa shong kurim sang, ka jingiashong kha para kur, shi kpa shi khun, shi ma shi pyrsa, ne shi hymmen shi para bad kumta ter ter. La ong ba haki Labang kane ka kam ka long kaba sang shisha bad ha ka lehniam leh rukom ruh kim lah ban pyndep ban pynkhuid ïaka sih ka sang bad kumta ïaki briew kiba leh ïa kane ka kam te ki shu khi lyndum ne khi lainuid bad pynkit hi ïaki ïaka pap ka sang bad beh ïaki shi syndon na u ryngkaw u samon. Ki riewtymmen ki ju iathuh khana ba kum ïakine ki jait briew te ki phah shaduh sha Puriang kaba mut shabar u pud u sam ka Ri Jaiñtia. La ong ba naduh nangne na Labang Nangphyllut ruh ki dang don kiba shah beh shata.

To ngin peit mynta balei ba kane ka Kya ka shah khot Kya Laisnem. Hato kine ruh ki iashong kurim sang seh?

Kane ka Kya ka don haka shnong Mooknor harud lynti ban leit na Mooriap Mooknor sha Khyndeliar hajan ka Mootylleiñ. Ki Labang mynta kaba ki khot ka Deiñkynthong bad kane ka Kya ka dang neh dangsah haduh mynta.

Myn hyndai ha Labang ka don kawei ka jingïatrei lang kaba ki khot ka,”Shruhpud” kane ka Shruhpud ka long ka jingïatrei kylliang para nongrep shisngi ha uwei bad shisngi ha uwei haduh banda ia ïoh bynta lang baroh shi kynhun. Bad ha kane ka Shruhpud ki ïabuh daka jingthew ïaka jingheh jong ka jaka kaba ki dei ban pyndep ha man la u wei pa uwei u nongiashim bynta. Kumta,”Shruh” kamut puh, prad, ne thiew haka ktien Labang bad, “Pud” ka mut u pud ba dei ban pyndep bad ban ïoh bynta lang baroh ki dkhot jong ka kynhun.

Ban ïatip khyndiat shaphang ka rep ka riang ki Labang to ngin phai khyndiat sha ka rukom rep jong ki. Ka thaiñ Labang ka long kaba dap daki lawbah lawsan kaba tap daki diengbah diengsan, ki siej ki shken, ki kait khlaw bad ki lamet latang, ka long ruh ka jaka lum kaba riat bad sharing bad kumta ka duna ki pynthor ki lyngkha kiba longthem long madan. Kumta haka jingïadei bad kane ka jaka, ki briew ki im da kaba rep syrti. Ki pom ïaki khlaw ki btap, ki dieng ki siej bad ki pynïap pynrkhiang ïa kine ki dieng ki siej bad ki thang daka ding ban pynkhuid haduh ban da bit ban bet ban thung. Ka rukom rep kaba kum kane ka long kaba tang shisnem shi jaka la kumno kumno ruh ar snem kata ruh ki ong ka rep “Yinteh” haka ba ki shait bet da u kba liyur u ba ki khot “Kba Sabiah”. Dei ban ap daki phewsnem haduh ba kane ka jaka kanda kylla lawbah lawsan ban long rep biang.

Ha kane ka bri ki bet ki thung lang bunjait ki jingthung haka juh ka jaka kum u kba u krai u riewhadem u neilieh nei iong u phan dieng phan jyrmi ki shriew ki sohlah ki jhur bunjait kum u pathaw u sohkhia soh baingon, soh mynken, lapong, yelling, u duma sla, u synrai, u sying bad kiwei kiwei. Mar shu dep thang bad pynkhuid ïaka bri ka jaka haki bnai March ne April ki bet ki thung shwa ïa kine ki symbai jhur. Ynda kine ki symbai jhur kila kham heh khamsan te ki bet pat ïa u kba bad ki puh ki prad pynkhuid iaki phlang ki khlaw bad ruh kumba tep ba tyllep khyndew syndon ïa u ta u symbai kba te ki pyndonkam daki mohkhiew rit ban puh ban thiew bad ïa kane ki khot, “Shruh”.

Haba ki iashruh pud kylliang kumne arphew ne laiphew ngut shi krup ki donkam haduh shibnai ne tam ban pyndep bad pynïoh bynta lut ha baroh ki dkhot. Hapoh kine ki por kim juh shongthait shongngiah, haki por hyndai te ka sngi U Blei ruh ympat ïatip hi te ki ïatrei beit man laka sngi haduh ban da dep lut shi syndon. Kumta bun na kito ki dkhot kiba kham thait kham leh jakhlia ialade te kim donpor shuh ban sum ban sait ban khapsñiuh ne ot tyrsim haduh ban da jrong ki sñiuh ki tyrsim bad mih ki ksi ki jynreiñ. Lait noh tang kito kiba shait ba khlaiñ kiba lah ban ïabeh ïaka sum ka sait haka por mynmiet bad mynstep.

Kane ka shruhpud kadon laka niam ka rukom kaba ki kñia ki khriam baki leh ki pyndep shwa ban sdang kane ka jingtrei ban ainguh ia U Blei Trai Kynrad Nongbuh Nongthaw ba un ai ïaki ka met kaba shait ba khlaiñ bad ban kyrkhu ïaka rep ka riang ka thung ka tep, u symbai u phniang jong ki. Ka don ruh ka temksing bad rwai kaba ki khot “Thai Laho” kaba ïadei bad kane hi ka phang.

La ong ba, napdeng kine ki dkhot kiba don ha kane ka krup shruhpud don uwei u briew uba naka jait Larom uba bunksi but jynreiñ bha bad kumta bun naki paralok ki kiar ban ïashong jan bad u kumta u sngew rem bad lehraiñ naka bynta kane. Ban khot da kiwei ki briew ban peit ksi ruh u lehraiñ te u khot daka pyrsa kur lajong ban peit ksi man ka sngi haka por shongthait bad por bamja sngi bad ki shong kham jngai kham pajih na kiba bun. Da kumne jan man ka sngi te kila ïa myllen bad khatduh u bymman u la ïohlad ban pynshoi ïaki bad kila iapoi sha ka ïahap kurim bad iashong kha sang para kur.

Ynda ki lok kiba bun kiba don hakane ka krup ki la ïohi ba ka jingïadei jong ki kala kham pher te kila sdang ban kylli pyrthew ïaki. Hynrei ki len beit bad ong ymdon ne kim shym la leh kumta. Katba dangïaid ki sngi ki por ka rukom im rukom leh jong ki kala nang kham pher te kumta ki nongïalam jong kane ka krup kim banse ban buddien ïaki bad ban kylli ban tohkit ïaki shaphang kane ka kam bad kila lap la shem ruh ïaka jingshisha. Hynrei wat la katta ruh ynda kylli da tohkit pat te ki dang len ïap len im beit. Kumta baroh kiba don ha kane ka kynhun kila dom la bitar ïaki bad ki buhpor buhsngi noh ban pynlong daka jingïalang shnong ha ryngkat bad kata ka kynhun shruhpud hi ban kylli ban tohkit bniah ban bishar ruh de ïaki.

Ha kane ka jingbishar, kiba lap ba shem bad ba ïohi ïa kane ka jingleh jong ki kila iathuh shaphang kane ha kata ka jingïalang. Hynrei wat la katta ruh ki dang ïa pyneh bad len beit, kumta baroh kiba don hakane ka jingïalang kila dom la bitar bad phah smai ïaki haka kyrteng ki blei ki dken bad u Syiem Pyrthat. Watla katta ruh ki dang ïa pyneh bad kila nud beit ban shim ïa kata ka smai ka byrnai kaba ha ryngkat ka kñia ka khriam kaba katkum ka niam ka rukom. 

Hadien bala dep ka niam ka rukom, u ta u Langdoh nongpynsmai u la phah ïaki ban smai haka kyrteng u Syiem Pyrthat daka ba ong, “Mynta ka sngi, ma nga u…bad ka… ngi pynshisha daka ba dih ïaka um kyntang na u klongsmai ba ngim shym la leh ïaka pap ka sang haka shongkha shongman kumba la kynnoh bad sakhi daki ta…kita… bad lada ngi len bad burieh ïaka pap ka sang jong ngi da kaba shim ïa kane ka smai ka tang haka kyrteng ki blei ki dken bad u Syiem Pyrthat te u Syiem Pyrthat un pynhap ïaka ‘leilieh bad thlieh ïa ngi baroh arngut”.

Ki tang shu dep dih ia uta u klongsmai te kila ong baka bneng kala sdang dum bad u pyrthat u la tied bad thlieh iaki baroh ar ngut hangta hangta hi kumba kila smai. Bad ynda kila ïap, tang shiphang la shit la rang biang ka bneng.

Uwei naki rangbah uba don lang ha kane ka jingjia u la shim da uwei u tynrai dieng Kya uba don hangta bad thung ha kata ka jaka ba thlieh u pyrthat ïa kita ki shijur khnang ban long ka dak ka jingsah jingkynmaw pateng la pateng. Bad u shim ruh sada uwei u maw uba kham heh bad pynieng lang ha trai une u dieng.

Mynta une u dieng Kya ula heh lasan ban long ka sakhi satar ïa kane ka jingjia ne ka parom ka khana haduh kine ki sngi.

(Ia kane ka khana la ïoh pateng na u (L) Kanet Shadap, Waheh Chnong ba rim jong ka shnong Mooknor)

Share this:
Previous

Ym ye ka sorkar wow kyrriah yabor lada chong pyrchah ya ka aiñ leh, ong uwa yahkhmat ki Sikh

Next

Khlaad noh ka kong Ailinda Mary Kharshiing