Jowai: Ka ri-loom Jaiñtia toh ka ri wa da naam ha i booh ya ki moo-pynyieñ kam ka dak wow pynsahnaam ya ka thma, u bru, i jia, wa kiwi kiwi heiwa boon na ki sah ki du hei parom.
Ha kani ka kynti neiliang u Wyrta da pyrchang i u thooh yutip katwa ye chaphang u Mot u Yang Sayoo Sutnga uwa em ha Madan Blai Sutnga, Mynska, West Jaiñtia Hills.
Da ong wa u Yang Sayoo Sutnga toh uwi na ki montri wa khroo u yong u Syiem Sutnga, ha uwa da ekti wow da wow sonteri ya ka hima ha chnong Mynska, Elaka Shangpung.
Heitæ i por da em uwi u mar ya uwi tip kam u Long Darkooh uwa ya ryngkat bor bha wa u Montri Yang.
Hadien kattu katni por da em i yaknieh bor hapyrdi yong kini ki ar ngut wow man kam u Montri.
Ha kawi ka sngi deiwa ya danda da yakop ki uwi ya uwi heiwa yi wa khlan bor.
Da yabait ki wow ya pynyoo bor heiwa da yakop ki katwa khlan u phaar na iwi i kyor uwi u loom cha iwi, wei ini i thaw em i pyn ha Madan Blai Stutnga wei ini i jngai hapyrdi kini ki ar loom em i kamwa 50 phut.
Chwa wow phaar ki da ya tasu hapyrdi yong ki yi wow phaar chwa, heitæ da bait u Yang wow phaar chwa neibhah oo man u u Montri u Syiem.
Manda phaar u Yang da poi u cha chilliang wei manda poi ka pali u Long wei oo leh da poi u cha chilliang, heijooh i thaw wa poi u Yang.
Hadien ini yow pait yi wa khlan da pynbait wow phaar biang cha chilliang dei dien, wei da bait wa ha kani ka kynti u phaar chwa da u Long.
Manda phaar u Long da poi u cha chilliang, ha ka pali u Yang manda phaar u dei dien chwa wow poi u cha chilliang, syndet syndet u Long da pynkhai u ya u chær (soom) uwa da dung ya u Yang heiwa da khlaad noh u.
U syiem Sutnga manda yoh khubor u wa da yap u Montri Yang da hukum u wow pyndep niam ya oo ha ini i thaw wa yieñ uni u mot deiwa hukum leh ya u Long wow thooh u ya u moo wow pynyieñ sahnaam ya u Yang kam uwi ki montri wa khroo yong oo.
U Long Darkooh da lai thooh u wei da rah u ya uni u moo na Wah Jahong kawa em hajan ka chnong Mynska wei da pynyieñ u ya uni u moo ha ini i thaw wa pyndep niam ya u Yang.
Wei ya uni u Moo Pynyieñ da tip noh kam u Mot u Yang, hei naam u Montri Yang Sayoo Sutnga.
Uni u Mot dang em u hadooh katni ha Dongwah ka chnong Mynska, hajan ka Madan Ball kani ka chnong.
Hadooh katni kiwa ngait ya ka Niamtre dang pyndep ki ya ka lehniam wa chisien chisnem wa tip kam ka Kñia Hula.
Discussion about this post