Da u: Shimphang Lyngdoh
Nadooh wa dang khynnah bha,
Jooh kynmoo O thij thij ya ka;
Manla u snem da jooh pynkhreh,
Da ki Rangbah da ki Waheh.
Jar jiar ka dhab da ya syllok,
Yalehke Siat-Thong yoh u yakob;
Ki kapten ka dhab da pynyoo,
Dep khait rong yong dep khait rong soo.
Mar ya poi ka sngi wada yakut,
Ki Khnam ki Ryntieh dep pynbiang lut;
Ka Thong da sæh ha pyrdi madan,
Kiwa yasiat da pynbait tkhan.
Chei-chei Wasoo Chei-chei Wayong,
Kiwa kyrchaan da kbai da ong;
Yoh u pyneh daw jar jiar ka bhah,
Ki Khnam ha Thong yoh u tasbah.
Kiwa smat dep ‘Keiñ-noh’ da ong,
Yoh u pynsangeh siat ya ka thong;
Da poi ka pali u yañiaw yalakha,
Kiwa jop ya ka thong da pynchaad bha.
Kattu da toh ka pali u ya rwai phawar,
Jar kiwa kyrchaan da yieñlaiñ sar;
Yoh u phawar kynnoh ya kiwa chah rem,
Da ka kbai ka khyr-iaw ka chaad ka kyrtem.
Khnam Chatu Chatat wa nep,
Kam Thawalieh wa hær chajrong;
Ki Khnam tæ mar katjooh,
Ki Ryntieh tæ jar jiar lajong.
…hoi kiw…
Chadiang Longru Longræng,
Wa tymmoh hapoh phylloh;
I kiwa jop tæ yachaad kmen,
Ki pli wa rem tæ da yap sti yap rkhoh.
…hoi kiw…
Chikham ki Khnam ha kti,
U ksoh du ha’u wi u Ryntieh;
Ha ka Thong u Chei sbak-sbak,
Wi…Ar…Le mar sien ya kieh.
…hoi kiw…
A ki pli wa rem da dih kiad jaw,
Su i kthang i blad ya ki ngaw-ngaw;
Ki kti ki kjat wa kem kyrbeh,
Ki Khnam ha Thong yong ki ym neh.
…hoi kiw…
