15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1

15 snem pura lai luti ka Thaiwan Museum dei bor samen khlem yoh yarap

Advertisement ad1
Advertisement ad1

Ka Thaiwan Museum wa em ha Chutwakhu Jowai, wa man tre da u waheh Kamai War, kawa ye u man du kam kani ka Museum wa pynlai da u bru samen ha ka thaaiñ wa yaleh u pynneh pynsah yaki tiar ki tar tynre yong ka jaitbru Pnar, wa kynthup nadooh ki tiar put tiar tem, ki tiar wa jooh pynemkaam hawa rep wa riang, wa chet wa tu, ki that ki sula najrong kiwa boon kiwi won ki jait tiar wa jooh pynemkaam ki waheh wasian nachwa ki wym rap yoo de haka pateiñ wa katni.

Ha uni u snem kani ka Thaiwan Museum da poi ko cha u moomær dap 15 snem i lai luti ha u bnai Wisu, tangwa hapyrdi kini ki snem i lai luti yong ka, ym pu yoh ko iwon iwon i yarap neiliang ka sorkar næ ki bru samen.

Hei yaklam wa u waheh Kamai War u tre yong kani ka Museum, khana u wa da sdang u wow pynneh pynsah yaki tiar tynre toh neidaw wa boonsien ki bru da yoobeiñ ki yaki tiar tynre, wei ym em leh wa e buit næ pynchlur ya oo, toh i angnood yong oo hi wow pynneh pynsah yaki dienkjat dienkti ki longchwa manchwa. 

Ini i pyrchang yong oo wow pynneh pynsah ym em kut i du lyngba ki tiar tangwa da pyrchang haroh u lyngba i thoh khnang wa ki pateiñ u yoh ki wow puræ.

“Heipor wa nga pynlang O ya kini ki tiar em wa ong yow krum mi ki, jubab O wa kwah i mynsien, kamtæ kat nang lai ki por nang yoh mynsien O wei nang pynheh pynboon O ki”, ong u Kamai War.

“Kynmoo O yei kyntien wa ong u pa, khon ka spah hajar dang yoh u thooh, katwa i naam i burom wym em wa ye u thied. Neitæ i daw lada em wa beiñ næ yaroh leh wym jooh ktah i ya nga, wei nga leh O yei yi wa nga sñiawsuk O”. 

Pynsñiaw haroh u i burom ya waroh kiwa wan pait ya kani ka Museum yong oo wot kiwa na baar jylla kamjooh, najrong wa sñiawngooh u yaki kynhun ki seiñ waphær waphær kiwa da tipmit yei kaam yong oo wei e naam haroh ya oo da ki khusnaam waphær waphær.

“Da e pyrtuid O ‘Thaiwan’ hajrong i yumut yow im biang ki tiar tynre nadooh ki that ki nep wei waroh ki tiar wa jooh pynemkaam u warim, neibhah sñiaw kjut nood O wow dooh jait ki dienkjat dienkti ki manchwa yow thai biang ki,” da ong u Kamai War hawa pynche yei yumut i pyrtuid Thaiwan.

Heiyatoh wa kani ka Museum khana u wa da em leh kiwa paan thied tangwa ym em e u neibhah sñiawthooh u wym ye u rah yaka spah chawa yap tangwa du i naam wa i burom donhi. 

Kamtæ heiyatoh wa ki laad yarap da pynsñiaw u yei diaw neibhah wa hadooh katni leh ym pu em yoh u iwon iwon i yarap na ki bor sorkar hanla boonsien da jooh lai ood lai nam u, tangwa boon du kiwa kular dei ktien khlem leh iyi iyi.

I angnood wa hakhmat dooh yong oo toh yow pynheh yei yung wei u chna leh dei yung khyndaw-bilat khnang yow lait nei khynnia wei joo um heipor slap. Khana u wa heipor wa sdang, em u du 50 jait ki tiar, katni won da em palat 300 tylli, wei kamwa arsien ha chi snem jooh pynkhooid u ki. 

Kamtæ lyngba ini ka kaam u waheh Kamai War, da kyntu u ya kiwi won ki para jaitbru wow maya ki yei tynre wei u pynneh pynsah khnang wa ka pateiñ hadien leh u tip ki ya i tynre ka riti dustur. 

Share this:
Previous

Da khang wow pynman yalang paidbah ha EKH, ki bia ki kaam yap bru hap paan bor

Next

Ka Phawar Siat-Thong Raij Rangad 32-snem nachwa