Jowai : Ka Pink Chain Cancer Campaign kawa da sdang nadooh ka 23 tarik uni u bnai ha NEC, Shillong wei da wan wai ya ka leh da u Jitendra Singh, Union Minister ka Sorkar India. Ynne ka sngi da pynman yaka ha Jowai heiwa da wan u Dr. Abishek Shankar, Oncologist na ka Hospital AIIMS wa em ha New Delhi.
Katkam i klam uni u Doctor da ong u wa cha ki thaiñ mihsngi (Northeast) ha kini ki snem da joor i kjut Cancer wei kam cha ka jylla Mizoram man ko kawa tam dooh ki bru wa kjut Cancer ha u kpoh du neidaw wa khlan ki u baam dohthaad wei yeini da dep pynsakhiat da ki stad sayan.
Ha ka jylla Meghalaya ong u wa joor bha i jait Cancer toh ha i bynta u radang wei ini boon ki por wa leh i baam kwai wa u duma wa kamjooh em kipor hiar pateiñ ini i kjut. Ong chooh chooh u wa emkaam u baam i ya ki baam wa chait wa khiah yow ye u yada kam neini i jait kjut.
Ong u leh waka sorkar dang pynkhreh ko yei dawai Vaccine hei yatoh wei Cervical Cancer iwa tip kam u Human Papilloma Virus (HPV) yow e cha ki kynthai yow yada yeini i kjut neibhah hadien ka Breast Cancer ini toh wa ktah bha ya ki kynthai hapoh India.
Ha kani ka yalang da wan chim bynta chongchit ki khynnah skur ka Jowai hadooh wa boon naki hap liwan ki wa da dooh thaw chong ki. Ki khynnah leh da mih ki cha khmat wei da haap yieñ ki da u laiñ yow yoh laad ki u kylli na u Dr. Shankar chaphang kiwa boon jait ki kjut Cancer wei hadooh wa kut kani ka yalang leh dang boon na ki khynnah wa wan cha khmat yow kylli na uni u Doctor.
Ya kani ka campaign da pynman da ka Northeastern Council, Shillong wei u pynkut yaka haka 29 tarik uni u bnai.
Discussion about this post