U Lahkmen Rymbui, MLA ka Amlarem Constituency uwa man leh uwa e buit ka sorkar jylla, ynne ka sngi hawa klam kam u kongsan ha ka yalang wai pyrda yei lehkmen dap 50 snem ka Nongtalang Govt. Secondary School, Nongtalang, ong u, ka puræ puthi ha ka juk wa katni ymtoh de du kat u ap hi-eh yei hikai kiwa sikai wei yaleh u ksoh kynmoo heipor wa thoh Exam khnang yow yoh ki Marks wa heh, tangwa ka juk katni toh u tip leh wow pyrkhat pynlai yumut yei sikai wa yoh lyngba i puræ puthi wa i sakhiat hei rukom im.
I kylla wa kam kani ong u emkaam bha ha ki khynnah skur kamwa emkaam ka juk stat Science waphær waphær, wei kam ki khynnah skur leh da sñiawthooh ki wa hadooh katwon ka juk stat Science da yarap ko yei im wa man-ka-sngi yong ki.
U Lahkmen Rymbui ong haroh u wa kam ki skur toh u e laad ya ki khynnah skur wow sñiawthooh ki yeiwa sakhiat, i eh i khoo hawa im kamjooh wei yeiwa jia wa sakhiat. Wei hajrong ini kiwa sikai em ki ka bynta wa kongsan, wym du wow sikai hapoh kamra skur tangwa wow pynyoo leh yei sakhiat ha ka pyrthai.
Kamtæ kyntu u ya kiwa sikai ka Nongtalang Govt. Secondary School wow sdang ki da ka Learning Club neibynta ki khynnah skur khnang yow yoh laad u yachem yumut kylliang para ki neibynta u yaklam ya kawon kawon ka mat, wei iwa kongsan tam u wanrah ki mat wa hap u ya pyrkhat para khynnah skur.
Kyntu haroh u ya kiwa sikai ka Nongtalang Govt. Secondary School wa emkaam leh u yah ya ki khynnah puræ Class 9 wa Class 10 kam cha ka Land Port wa em ha Dawki, khang yow sñiawthooh ki yei rukom ya khayi pateiñ lyngba katai ka thaw. Wei deiwa leh kamni boi daw em napyrdi ki khynnah skur ki wow man kiwa stat u kamai spah.
Ka juk puræ puthi wa katni man kawa emkaam bha wei pynkupbor ko ya idæ neibhah wa kani toh ka tynre yong i puræ puthi ha kini ki sngi, wei hajrong ini ong u wa ka sorkar leh da wanrah ko yaka New Education Policy.
Neiliang ka A.P. Syiem, District School Education Officer, West Jaiñtia Hills District kam ka symbood kongsan ong ko, kani ka sngi pynkynmoo ko yei lai luti wa chadien wei kammon u ye u pynbha chooh chooh chakhmat.
Yooluti ko wa lyngba kani ka lehkmen u yoh mynsien chooh chooh kiwa sikai, ki khynnah skur wa waroh kiwa embynta u nang kreh chitom chooh ki wow pynku yei puræ puthi.
Ha kani ka lehkmen da yoh leh i klam na u MDC ka thaaiñ, u Holando Lamin, i khana yaka parom tbian hajrong i lai luti kani ka skur na u Asst. Headmaster, u Albert Lyngdoh, i klam na u waheh chnong ka Nongtalang, u Min Lyngdoh wa kiwi.
Da pynchongchit ya kani ka sngi dei chimbynta ki khynnah skur wa dang puræ katni wa kiwa da pyndep kiwa da e da i chaad i rwai.
Discussion about this post