Jowai: Hajrong ka yurim wow pynsñiawthooh paidbah wa kammon u pynduna yei chah ktah, i mynsoo, i dooh yei mynsiem bru, i chah pynsih chah tympra iwa da chna da tei ha i por wa khih khmi, wa joor ka la-ær, u phria, i chlai um wa kiwi kiwi; ynne ka sngi da kynmoo yaka National Disaster Reduction Day haka yalang wada pynman ha Chutwakhu Indoor hall, Jowai wa pynlai daka chnat krehkaam District Disaster Management Authority, West Jaiñtia Hills District.
Neidaw wa uni u snem toh uwa da chah tynjooh haka khlam COVID-19, ka phang yong uni u snem leh toh “Disaster Management Plan with Special Emphasis on COVID-19”, heiwa da pynkynmoo hajrong wa kammon u man kitæ kiwa da pynkhreh kyrpang yow pynduna ya kani ka kjut.
Heiyatoh wa kani ka phang da em leh i pynsñiawthooh paidbah lyngba ki yalehke Drama wa tbian wada chimbynta daki dong waphær waphær ka chnong Jowai, heiwa yei naam jop da yoh rah daka Loompyrdi Iongpiah deilang waka song poisa wa T. 7000, da wan wa ar ka dorbar chnong Mynthong kawa da yoh leh yaka song poisa wa T. 5000, wa le ka dorbar chnong Chilliangraij kawa da jop yaka song poisa wa T. 5000 katwa ka Consolation Prize won da yoh ka kynhun u Bahduh.
U kongsan ha kani ka sngi u L. Kynjing, Additional Deputy Commissioner & CEO DDMA, West Jaiñtia Hills District, da pynkynmoo u hajrong i emkaam wow man ki bru kiwa sñiawthooh wei em i bahkhlieh ya kawon kawon ka kaam, heijooh i por wow bood ryntih leh yaki kyndon wada booh daki chnat wa toh u pait khnang yow ye u pynduna ya iwon iwon i jæd i pra næ i dooh nong nei bor ka rymaw hadooh wa yatoh waka khlam COVID-19.
Ha kani ka jooh ka sngi da em haroh i pynsñiawthooh hajrong wow pynduna pyndooh yei pynemkaam ya i drugs, kawa man chibynta yong ka thong National Mukt Bharat Campaign wa pynlai daka chnat District Social Welfare chirup i krehlang kiwi de ki chnat krehkaam wa ki seiñ.
Neiliang u A. Syiemiong uwa mihkhmat yaka Manbha Foundation ong u, kani toh ka thong yong ka sorkar bei yow pynsñiawthooh paidbah yow pynduna i pynemkaam Drugs hapoh ka ri India, neibhah katkam i thooh bniah haka ri waroh kawi, em palat 200 tylli ki District kiwa boon tam ki bru wa pynemkaam Drugs wei du hapoh Meghalaya da em hadooh soo tylli ki District.
Kamtæ kamwa kani leh toh kawi na i bynta yong ka Disaster Management neibhah wa boon ki khon khynroo kiwa chong chnong cha kdoh ki hei dih wa boonjait, neitæ i daw emkaam wow wanrah i pynsñiawthooh khnang yow ye u pyndooh jait yei dih pynmuaid kawa ye u pynhiar dor yaka ri.
Hawa batai pynche ya kani ka phang da pynsñiaw haroh u yei sñiawdiaw neibhah haka jylla kat nangmih ki sngi i pynemkaam drug nang ku nang ku i hapyrdi i krehkaam ki chnat waphær waphær kiwa pteiñ wow yakhun pyrchah næ pynsñiawthooh paidbah hajrong i maa yong i pynemkaam ya ki jait dih pynmuaid.
Da emlang leh ha kani ka sngi u President Synjuk Waheh Chnong u A. Ñiangti, ka Dy. SP In-charge Crime ka C. Lyngdoh, ka Dr. R. Passah In-charge Chutwakhu Urban Health Centre, ka J Synnah, District Social Welfare Officer wa kiwi haka yalang wa pynlai daka D.L. Kharkongor, DDMA, West Jaiñtia Hills District.
