Jowai: Hadien wa yaka yaw Raliang da khang nadooh wa em ka Lockdown haka jylla neidaw ka khlam COVID-19, neiliang u Dolloi ka Elaka Raliang u C. Lyngdoh da pyntip u wa ya kani ka yaw u sdang noh u wai yaka nadooh ka 3 tarik u Khonchonglad (Nov), 2020.
Kamtæ da kyntu u yaki paidbah wa chong dai kamjooh kiwa wan yaw wow sñiawbha ki u bood ryntih yaki kyndon sorkar yow yada nei poor ka khlam, deiwa deiñ yaki Mask, u ya jngai iwi yei wi, u man kiwa lehkhooid wei wow sait bha yaki kti, heijooh i por kiwa chong dukan toh u pynbiang ki yaki um sait kti haphrang dukan.
Heiyatoh wa ini, neiliang ki dkhot ka COVID-19 Market Management Committee wa pait ya kani ka yaw leh daw em hi ki ha kani ka sngi yow pait sylli ki yei rukom man ka yaw wei u pyntikna leh wa ki paidbah toh u bood ki yaki kyndon wada hukum ka sorkar.
Chooh chooh u Dolloi ka Elaka Raliang uwa man leh kam u Chairman ka COVID-19 Market Management Committee yong ka yaw Raliang pyntip u wa ha katai ka sngi sdang yaw, daw em leh ka yalang pynsñiawthooh paidbah ha katai ka yaw. Wei neiliang yong ki daw pynkhreh haroh ki yaki um sait kti chwa u psiah chapoh yaw.
Kam wow pynkynmoo, ya kani ka yaw da pynlai daka Raij Raliang lyngba u Dolloi, Pator, u Langdoh waki Ñiaw Waheh Ñiaw Wakñi yong ki le chnong wa kynthup yaka Raliang, Laskeiñ waka Nongkynrih. Wei ya kani ka yaw da pynkhooid pynpliah ki yaka nadooh ka 29 tarik u Naikhynde kam chibynta i pynkhreh wow wai yaka.