theme-sticky-logo-alt
theme-logo-alt
Advertisement ad1
Advertisement ad1

Ka pynsñiawthooh ya ki laad yada wei yarap ya kiwa pynemkaam drug

Advertisement ad1

Ka Mihmyntdu Community Social Welfare Association (MCSWA) Targeted Intervention (TI) on Injecting Drug User (IDU) kawa em hapoh i pait yong ka Meghalaya AIDS Control Society (MACS) da pynman ko ya ka yalang pynsñiawthooh paidbah hajrong ka phang “Prevention of Alcoholism & Substance Abuse” ha Khliehtyrchi Dorbar Hall Mookyniang, West Jaiñtia Hills ynnin ka 9 tarik.

Ya kani ka yalang da pynman ryngkat i krehlang waka yung krehkaam ka District Social Welfare Officer (DSWO), Jowai wei da pynlai ya ka da u Waheh Chnong ka Khliehtyrshi, West Jaiñtia Hills.

Advertisement ad1
Advertisement ad1

Da yoh yei pynche hajrong i krehkaam yong ka MCSWA TI-IDU Jowai, na ka S. Meliora Lamare, Program Manager, kawa da khana ya ki laad yada wa ki yarap ya ki bru kiwa da chah kdoh chah khoom hei drug.

Da khana ko leh chaphang i rukom yarap e dawai ya kitu kiwa da yaleh wow lait noh nei dih drug kawa tip kam ka Opioid Substitution Therapy (OST), i yarap syllok, i leh ya ki Medical Checkup, ki Test kam ki HIV/STI wa ka TB kiwa ym emkaam u su dei dor wa kiwi kiwi de ki e sumaar hapoh ka yung krehkaam ka MCSWA kawa em ha Ladthalaboh, Jowai mar pyrchah ya ka IDBI Bank.

Da yoh leh yei klam na ka J. Synnah, DSWO yong ka WJH District, kawa da e yei yaroh ya kani ka seiñ wa kreh mon sñiawbha wa chimkhia ki u pynman ya kam kini ki jait yalang wa e myntoi chiboon ya ki khon khynroo, ki rangbah yong ka chnong yow ye ki u lait næ u yada ya idæ nei dih wa sih. Da e ko leh i batai hajrong ki Scheme waphær waphær kiwa em hapoh ka chnat Social Welfare kam ki Child Welfare Scheme, Women’s Welfare Scheme wa kamjooh ki Scheme neibynta ki khynnah kiwa em i duna. Da kyntu ko ya ki dkhot yong kani ka chnong wow pynmih ya ki seiñ khynroo næ ki seiñbhalang ki waphær waphær khnang wow yoh ki yei myntoi wa boon na ka yung krehkaam ka DSWO.

Da yoh leh yei batai bniah na ka Dr. J.N. Shullai, Director MCSWA West & East Jaintia Hills District, kawa da batai che yei sih wa mih neiwa pynemkaam yei dih pynmuaid, kam yei kiad, bhang, drug wa kiwi kiwi de. I dih kiad lane drug wanrah ko yei kjut hei doh i pran, ktah ko yei bor pyrkhat pyrdaiñ, i yatoh ha yung ha sem wa ka imlang sahlang waroh kawi.

Da ong ko wa i chah kdoh chah khoom ha ini i dih pynman ko ya ki khynnah, ki khynroo u dooh noh yei thrang lane ka thong kawa da thmu ki ya ka mynried kawa bha yong ki. Kamtæ da kyntu ko ya ki bei ki pa wow syndong yei lai i wan, ki lok ki jor ki khon yong ki kiwa ye u yah chei wa sih. Da ong ko leh wa i kyrni drug (Drug Addiction) da man ko ka kjut ha kini ki sngi, kawa emkaam i sumaar kawa paka wow yoh yei chait.

Ya ki kyntien khublei da yoh na ka Dayooshisha Ryngkhlem, Counsellor MCSWA TI-IDU, Jowai.

Share this:
Previous

Hap wow yaleh ya ka Khasi lane Garo Paper hapoh ka Meghalaya Judicial Service

Next

Da pynlait ya u khoo rachon neibynta u Naisaphra ha Amlarem Sub-Division