Ka Tham u Rangli Juki (TUR) da thoh ko cha ka Expert Committee kawa da thung yow pait deiwa ya ka Meghalaya State Reservation Policy 1972 deiwa e lang ki sakhi satar kiwa ye u yieñ hahkhmat ka aiñ waka Riti Synchaar.
Ka TUR da ong ko wa hawa pynkylla ya ka Reservation Policy toh u man ko katkam ki sakhi wa ki sabut wa biang wei nachwa da pynkrehkaam ka da 40-40% wa 5% nadooh u snem 1972 wei ka Expert Committee ye ko wow chem chitom wow pynkylla khlem da yachah chiliang ya kawon kawon ka jaitbru iwa khlem da man pyrchah leh ya ka riti synchaar.
Kamtæ deiwa thooh bniah da iwa da leh da ki sorkar warim da tyrwa wow pynpsiah noh da ka “Deprivation Point” kawa man kam ka laad ya kiwa dang sahdien wow yoh ki ya ka bhah yoh kaam deiwa booh ya ka bynta wa kyrpang ya kiwa wa dang sahdien kiwa man leh kiwa duna ha ka roi ka paar, ka yoh ka kot.
Da ong leh wa i rukom krehkaam ka Reservation Policy kawa katni toh kawa leh chiliang kawa pynyoh nong du ya kiwa chong chnong kiwa sah ha ki District kiwa da ku chaphrang kiwa wan na ki manyung kiwa da mahajon chwa kiwa ye wow phah skur ya ki khon ki cha kiwa sy’at hadooh cha baar ka jylla.
Kani ka Deprivation Point wa ka TUR da tyrwa ko wow pynpsiah ha ka Reservation Policy toh deiwa pynchong yurim yei yoh i kot ka yung ka sem, i long i man ka thaaiñ wa wan kiwa yaleh kreh kamjooh ki thaw puræ wei yeini toh u pait man ka san snem katkam i roi i paar wa i ku ka District.
Lada toh wan man ki ki khon ki Grade-A Officer ka sorkar kiwa da yoh laad wow puræ ha ki thaw wa bha tam ym ye ki wow psiah hapoh ka Deprivation Point.
Ka TUR da ong ko leh wa ini i rukom yabhah kreh ymtoh wow pait da ka jiatbru, khlem da pait ya yei boon paaid iwa emkaam toh wow kyntu kyrong ya kiwa dang sahdien.
Discussion about this post