Jowai : Ha ka yakhun Quarter Final yong ka Tiger Five ka Umchangiar da yachem ko ya ka Mynthong SC. Hawa sdang yong ka yalehke ka Umshangiar SC da yoh chwa ko wow pynkhih yaka jaar ha ka minit kawa 6 lyngba u Marbud Lato Jersey No.10.
Ka yalehke man ko kawa chongchit wei yoosuk neibhah waroh arliang man ki kiwa ya biang i buit wei bor yalehke. Neiliang ka Mynthong pyrchang ko wow su ya ka kool tangwa kiwa yalehke ka Umshangiar ym em e laad ki hadooh wa kut ka kylla step wei da kut du kawi donhi ka kool yong ka Umshangiar.
Hawa sdang won ka kylla miet, ka Mynthong hadien wada yoh ki u seiñ yei bor, da yohlad ki wow thap ya ka kool wa nyngkong ha ka minit wa 32 lyngba u Heiplanmi Gassar, Jersey No.15, lyngba kani ka kool kiwa yalehke yong ka Mynthong da yoh bor chooh chooh ki kat hadooh wa yoh ki u pyntam ya ka kool wa ar wada thap da u Yuletideborn Langbang, Jersey No. 6 ha ka minit wa 38, katwa ha ka minit wa 48 ka Mynthong SC da yoh biang ko wow su ya ka kool wa le lyngba u Prosperly Langbang, Jersey No.5.
Ki wayalehke ka Umshangiar hadien wada chah pyntam ko ya ki kool ha ka Mynthong SC da sdang ko u pynwandur wei pynlai yumut hei rukom yalehke yong ka kat hadooh wa da yoh u thap ya ka kool wa ar ha ka minute wa 49 lyngba u Monlang Niang.
Hachwa u kut ka yalehke yong ka kylla miet ha ka minit kawa 53 ka Umchangiar da yoh ko wow su ya ka kool kawa le lyngba u Pyrkhatki Dkhar, Jersey No. 9. Lyngba kani ka kool wa khaddoh na ka Umshangiar ka yalehke yong ka Quarter Final wa nyngkong man ko ka wa ya drawn.
Kamtæ katkam ka kyndon (rules) yong ka yalehke kini ki arliang haap ki u yachut da ka Tie Breaker khnang yow yoh yei naam jop. Ha ka yachut ka Umshangiar na ki 7 ngut kiwa chut da ye ko wow thap ya 5 tylli ki kool, katwa ka Mynthong won na ki 7 ngut ye ko u thap du 4 tylli ki kool. Kamtæ ka Umshangiar da man ko ka dhab (team) wa jop ynne ka janmiet. Wei da yoh ko leh u psiah cha ka Semi Final.
Discussion about this post