Jowai: Ka CSC e-governance Services India Ltd ynne ka sngi da pynman ki ya ka Workshop kawa chi sngi hajrong ka phang Pradhan Mantri Gramin Digital Saksharta Abhiyan (PMGDISHA) ha Jowai Paradiso Conference Room, West Jaiñtia Hills District.
Ha kani ka sngi da wan wow e sikai wow pynsñiawthooh ya kani ka scheme da u Joshua Hegan Lyngdoh uwa man kam u State Anchor CSC-SPV uwa pait ya ki Common Services Centres (CSCs) ha jylla Meghalaya.
U Joshua da batai u wa kani ka scheme PMGDISHA toh kawa na ka sorkar pyrdi kawa wanrah da ka Ministry of Electronics and Information Technology Government of India. Kani ka Scheme toh ka wow yarap ya ki bru yow tip ki wow pynemkaam ya ki tiar Computer, ki Smart phone, Internet, pynemkaam e-mail, kamjooh wow yoh myntoi na ki Scheme sorkar khamtam kitu wa wan na ki thaw wa dooh wa duk na nongkyndong.
Kani ka Scheme toh kawa da e mynkna ya kiwa em nadooh ka rta wa 14 snem hadooh 60 snem wei ka esikai u man ko 10 hadooh 30 sngi.
I thmu wa pynman ya ka yalang ynne ka sngi toh yow pynsñiawthooh wei wow pyntip cha kiwi chaphang kani ka Scheme khnang wa ki bru na ki chnong waphær waphær u yoh myntoi ki na kani ka scheme khamtam ha ki chnong nongkyndong kiwa jngai na sor yow yoh sikai ki u pynemkaam Computer.
U Joshua da ong wa ya kani ka scheme, ki bru ye ki wan mih wow thap pyrtuid (Enroll) ha ki Common Services Centres (CSCs) kiwa em ha ki chnong waphær waphær ha ki District yong ka jylla.
Kiwi kiwi de kiwa klam kynthup ki ya u Pradeep Chauhan (CSC-SPV), u Marda Oo Myrchiang (CSC DM), ka Ameecia Pariat (CSC DM), ka Regina Sympli (CSC DM) wa u Helpman Phawa (CSC DM).
Ha kani ka sngi da wan ya chimbynta da kiwa boon ki Village Level Entrepreneurs (VLEs) kiwa pynlai ya ki CSCs na kylleiñ ka West wa East Jaiñtia Hills District.
Discussion about this post