Jowai : Ka ophis krehkaam ka Seiñ Behiaw Transport Cooperation Society Ltd., West Jaiñtia Hills District haka 23 tarik uni u bnai da pynman ki ya ka program kut snem yong ka seiñ ha yungwalieh ka Loomiongkjam.
Kani ka program kutsnem toh yow yoh i klam sneiñ kyntu na ki waheh wa sian ka seiñ khnang wa ka seiñ u imslem ko teiñ la pateiñ, wei ki dkhot leh u em ki i yakrehlang ya sñiawthooh yumut.
Ha kani ka yalang dawan emlang ki dkhot yong ka Seiñ Behiaw Transport Cooperation Society Ltd. West Jaiñtia Hills District.
Ya ka yalang da pyllai da u Chairman ka seiñ u ma S.Siangbood wei chwa wa ka yalang u lai ko chakhmat da em chwa i kynmoo warom ya ki dkhot wa da khlad deiwa yieñ suki ki chi minit.
Ki waheh wa sian ka seiñ kam u ma Kaipor Kyndiah, ma Thawmon Bamon da khana ki wa kani ka seiñ da lai luti ko kattu la 36 tylli ki snem, i daw wa pynman ya kani ka seiñ u mih ko toh hadien wa boon kiwa pli ki wa beh yaw nachwa chah yoh beiñ ki ha ki mahajon neidaw wa duk ki u chkeh yei lai i wan da ka kari yong ki. Kamtæ hadien da rai ki u pyllang poisa yow yoh u thied da ka kari yong ki hi, mynda yoh kari ki i kaam ka seiñ da lai bait lai ryntih ki hadooh katni.
Da e haroh ki i warom cha kitu ki dkhot wa sein nyngkong ya kani ka Sein Behiaw deiwa ong lym em da ki kiwa stad i ym yoh i yei suk kamwa man i katni.
Kamtæ da kyntu ki ya ki para dkhot wow man kiwa yakrehlang wei ya e yumut lang hei won iwon i kaam khnang wa ka seiñ u imslem ko.
Da em leh i pynkup burom ya 3 ngut ki dkhot ka seiñ kiwa da dap 36 snem i krehkaam hapoh ka seiñ kynthup ya u ma Yiewmi Laloo, u ma Oriwell Shullai, u ma Hamkom Sumer. Heijooh i por leh da pynkup burom ya u kongsan u ma B.S. Majaw.
Discussion about this post