Ka sngi Muchai ka Behdieñkhlam ka wow pynneh yei doh i pran uwi pa uwi

Ha ka sngi pynkut ya ka Shad Nongkrem wan e kti u Lat ya ka aiñ Hima Khyrim Act, 2024

November 12, 2024

Da pynthymme ya kiwa kitkaam ka Khyrdoh Kur Passah

November 11, 2024

Jowai : Hadien wa da wanrah i cha phi ya ki lehniam ha i step yong ka Muchai ynne ka 13 tarik kattu neiliang u Wyrta u wanrah i cha phi ya i bynta nadooh chtieñ sngi na Aitnar kawa man kawa phooh wa phieñ.

Ha Aitnar hadien wa ki Khon Raij da tympat ki ya ka Symbood Khnong ki Kmai Raij da pynpoi ki ya ki rot yow pynhiar ha Aitnar.

Hadien wada pynhiar ki Kmai Raij ya ar tylli ki rot ha Aitnar ki Khon Raij (Chilliangraij) da e ki ya ka Symbood Khnong ha Aitnar yow knieh ki khon ka Raij yow eh ka bok ka nasib.

Manda dep e ya ka Symbood Khnong ki Kmai Raij da sdang ki u pynhiar ya ki rot ha Aitnar.

Ya ini i lehniam ha Aitnar da wan sakhi da ki spah ngut na kylleiñ ka ri-loom Jaiñtia, ka jylla wa kiwi.

Da wan sakhi da u Lat ka jylla Meghalaya u V. Shanmuganathan, u Chief Justice ka Meghalaya High Court u Justice Dinesh Maheswari, u Montri ka Transport Department u H.D.R Lyngdoh, ka Home Minster ka kong Roshan Warjri, u Montri ka PWD u Sniawbha Dhar, u MLA ka Umroi Constituency u Ngaitlang Dhar, u Deputy Commissioner ka West Jaintia Hills u Arunkumar Kembhavi, ki MDC ka Jaiñtia Hills Autonomous District Council.

Hadien wa da pynhiar ya waroh ki rot ki Khon Raij da pynhiar ki ya ka Khnong Blai ha Aitnar wow yaknieh u tba ya ka yow eh ka bok ka nasib, yow bha ka khih ka kreh yow yoh i roi i paar.

I knieh ya ka Knong ym mut ko kat du yeitæ katni, man ko kam ka dak wa ong wa uwa yoh u tba u yooh ya ka man u uwa chkeh, wei ym du kat itæ mut ko leh wa uwa yoh u tba ya ka yow yoh i kyrkhu, daw kwah u wow pynneh yei doh yei prang yong oo dahi neibhah poi snem nawon daw kwah ma kwah biang u wow yoh yei kyrkhu.

Ha kani ka sngi u Lat ka Jylla kamjooh u Chief Justice da hiar ki harood ka Aitnar yow e khublei ya ki khon ka Raij wei u DC ka WJH da hiar u wow chaad ha Aitnar wot hadooh wow yaknieh u ya ka Khnong Blai.

Ha i janmiet won hadien wa da noh ya ki rot da pyndep sa ya ka Datlawakor hapyrdi ka Pynthor Wah wa ka Pynyhor Neiñ ha Sawiar (Mynthong-Sarok hajan Madan Siatthong).

Ha ka Datlawakor ka Pynthor Wah da man ko kawa jop wei da ye ko u jop du hapoh 3:27 minit. Manda kut ka Datlawakor neiliang u Dolloi da pyntip u wa kani toh ka sien wa nyngkong heiwa da em wa jop du hapoh i por 3:24 minit donhi.