Uwa e ktien ka Meghalaya Congress, u Zenith M. Sangma da ong u ynne ka sngi wa i mih khubor wa ki nong India da chah paitsiar ki ha ka NSO Group deiwa pynemkaam ya ka Pegasus Spyware iwa da pynyohlaad wow lorni yei yaklam ki bru, ki Password, ki Phone Number, ki Text Messages wa ki Voice Calls yong ki Montri ka ri, kiwa yahkhmat ka liang pyrchah, ki heh chipai hadooh ki Judge ka Supreme Court man ko iwa khyrngiat bha wei kawa man pyrchah ya ka aiñ.
“Ini i lorni da i stat wa chna da ka Israel kawa tip kam ka Pegasus ya kiwa chong chnong man ko pyrchah ya ka riti synchaar paidbah wa i hok ki paidbah ha ki kaam wa leh ki dei yong samen ki,” da ong u Zenith Sangma.
Da ong u wa ka Congress beiñ ko ya ini i leh da ka sorkar pyrdi.
Da khana u leh wa ka Congress daw pynyoo ko yei pyrchah ha kylleiñ ka ri wei da dawa leh wow pynman ya ka takit kawa toh u pait da ka Supreme Court yow chem yei hok wei wow pynchitom ya kiwa emkti.
Da ong u leh wa ini man ko pyrchah ya ka aiñ heiwa da psiah tooh chapoh ki Phone ki bru wa emkaam hapoh ka ri, da pynyoo ko leh yei rukom krehkaam kani ka sorkar ka BJP.
Da ong u leh wa da em i mih khubor wa da pynemkaam ya ka Spyware Pegasus yow psiah tooh chapoh ki Mobile Phone chwa ka Election MP ha u 2019.
“Ka Pegasus Spyware wa waroh kiwa pynmih ka NSO da dai du cha ka sorkar donhi. Ini da pynyoo che wa ka sorkar India wa ki chnat yong ka da thied ki ya ka Spyware yow yoh u psiah chapoh ki Phone yong kiwa yahkhmat ka liang pyrchah, kiwa thoh khubor, ki muktiar wa ki bru samen,”da ong u Zenith.
Da khana u leh wa daw pynman ya ka yakhih ha kylleiñ ka ri hajrong ini ha ka 22 tarik uni u bnai.
