Ka Sur ka Bri u Hynniewtrep ynne da maham ko wow pynjoor yei yakhih hajrong i chah tynyap u General Secretary warim ka HNLC, u Cherish S Thangkhiew deiwa pynbaad wa ka sorkar da pynslem chanam ko wow pynchitom beh kreh chipor ya ki heh pulit deiwa ong wa daw pynman ko leh ya i yakhih iwa syndet syndet.
Hawa pynman yakhih ynne ha Madan Malki, u Secretary Ka Sur Ka Bri U Hynniewtrep, u Marbud Dkhar da maham u wa ki yakhih waroh chi kattu da man ki katkam ki riti synchaar paidbah tangwa ka wyrta cha ka sorkar toh wa ka i yakhih daw man i iwa joor kat dang mih ki sngi wei daw em leh ki yakhih kiwa syndet syndet.
Kam wow kdaw heini, da em i dawa wow beh kreh chipor ya ki le ngut ki sahep pulit kiwa kynthup ya u Director General of Police u R Chandranathan, Superintendent of Police ka East Jaiñtia Hills u Jagpal Singh wa u SP (Traffic) ka East Khasi Hills, u Shailendra Bamaniya.
U Dkhar da ong u leh wa da lai da ki bnai kattu wei i yakhih yong ki ympu em u mih soh ki nei wym mano ka sorkar.
Hajrong i chah pynbaad wa ka seiñ da leh Politics ko, u Dkhar da ong u wa ha Ka Sur ka Bri u Hynniewtrep ym em ka Politics wei ym em ka lama tangwa du i sur ki paidbah wei daw yakhun hadooh wa yoh kiwa hayung u Thangkhiew ya i hok.
Hawa yaklam won wa kiwa pathai khubor, u Dkhar da ong u wa kwah ki ya i synchaar wa khooid wei da pyrchang ki wow yachem ya u Montri ki kaam pohyung, u Lahkmen Rymbui tangwa da ong wa da lai u cha nongbah New Delhi wei ye u wow yachem ya ki du hadien ki chuti Puja wei ka seiñ daw yachem ko wa oo (Lahkmen) mar kut ka chuti.
Uwi na ki dkhot ka seiñ, u Donboklang Kharlyngdoh da ong u wa ka seiñ ym chong-ngiah ko kat hadooh wa ka sorkar u e ko ya i dawa wei hajrong ki yakhih ka seiñ neini chaphrang daw pynbna hadien wa chong yalang ka Executive Committee.
