Ka sorkar emkaam ko wow kem ya ki heh kiwa dai drugs, ym toh u dai sarom ki paidbah ya kiwa dih drugs: Meghalaya Drug Users’ Coalition

Shillong: Ka Meghalaya Drug Users’ Coalition ka seiñ kawa em ki dkhot naka Meghalaya Drug Users’ Network, Drug Users’ Union of Meghalaya, Meghalaya State Network of Positive People wa Jaintia Network of Positive People da ong ko wa neidaw wa da boon ki bru wa pynemkaam drugs hapoh ka jylla kiwa chah kem nadooh kiwa pynemkaam wa kamjooh kiwa dai drugs, ka sorkar toh u pylut bor ko wow kem ya kiwa dai.

Hawa yaklam ynne ka sngi wa kiwa thoh khubor, u President ka Drug Users Union of Meghalaya, u Neil Khongwir da ong u, “Toh u chimkhia ka sorkar wow pait ya kiwa dai drugs yow duna i roi kiwa dih drugs neidaw wa katni suk bha u yoh drugs wei ye u em iyi iyi wa pynman ya ini.”

“Iyi jia ya kiwa chah kem kiwa dai drugs, wei ym ktah ko lada kem ya kiwi dai drugs kiwa khian wa nai lada ym yoh u kem ya kiwa khayi heh,” da ong chooh chooh u.

U President ka Meghalaya State Network of Positive People u Barry Kharmalki da ong u wa ka Drug Policy toh kawa da sahkut la 4-5 snem wei emkaam wow pynkrehkaam noh yaka.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha iwi tawon i liang da ong u wa i poor ki Video yong kiwa dih drugs kiwa chah dat haki paidbah da pynman yaki kiwa chah kyntait haka imlang sahlang, u Kharmalki da ong u wa ka Meghalaya Drug Users’ Coalition ym chong kli kti ko ya ini neibhah da chah tyngkheiñ yei hok yong ki kam ki bru.

Ki dkhot kani ka seiñ da e nongmuna ki wa haka 7 tarik uni u bnai da em iwa jia ha Polo, Shillong heiwa kiwa pynemkaam drug da pynlai paidbah ki wei ya ini i Video da poor i haki Social Media hadooh wa kini ki bru da chah beh ki naki thaw sah ki iwa man pyrchah ya i hok manbru yong ki namo ka Human Rights.

U Kharmalki da ong u wa daw lai katkam ka aiñ ya kiwa dai sarom ya kiwa dih drugs wei ini i leh ki paidbah ym em yarap ko iyi iyi leh.

Da ong u waka imlang sahlang toh u chim ko yaka rai wow yatylli wow yaleh wow pyndooh ya u drug wei ym toh wow kyntait ya kiwa dih drug haka imlang sahlang deiwa dat wa choh ya ki neibhah emkaam wow kyrchaan yaki wow ye ki u dam noh na kani ka kaam.

Da ong u leh wa kiwa chah dat haki paidbah boon ki por wiar ki wei ye u yah yaki cha ki kaam wa sih chooh chooh neidaw wa da chah dai sarom ki.

Heijooh i por da ong u wa ym toh wa kyrchaan ya i dih drugs wei lada chah kem kiwa dih drugs ym toh u dai sarom ya ki.

Deiwa em hadooh palat 3000 ngut kiwa dih drugs kiwa da tipmit hapoh ka jylla, u Kharmalki da ong u wa ym ye u ong wa waroh ki kaam tooh toh kiwa leh kiwa dih drugs wei daw lai katkam ka aiñ ya kiwa pynbaad bakla yaki.