15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Ka sorkar MDA ym em hi kwah ko wow pynsñiaw cha ka MHA yei pyrchah ki paidbah:EJNC

0 Comments

Neiliang ka EJNC kawi na ki seiñbhalang kawa na East Jaiñtia Hills kawa kyrchaan rangbah ya ka Synjuk Waheh Chnong East Jaiñtia Hills District wow pyrchah ya i wanrah ya u mooyong na Assam kiwa thmu wow pynhaap chaki karkhana khyndawbilat kiwa em hapoh EJHD nei tieñ yei poor smat yong u khñiang COVID-19 uwa ktah yaka pyrthai waroh kawi.

Hawa pait ya i pynche neiliang u Montri Rangbah ka jylla u Conrad Sangma wa ka sorkar jylla bood ko ya i phah yong ka MHA wow pynbiang ya iwa emkaam kitai ki karkhana khyndawbilat wa kiwi kiwi, wei u chah leh ya ki wow wanrah ya u mooyong na Assam, ka seiñ da ong ko wa ini toh khlem pyrkhat yei maa wa i eh i wow wanrah ya i ki tre ri.

Ka EJNC da pynrem joor ko ya ka sorkar MDA kawa e bor wow daiñ kuna lane pynchitom ya ki tre ri kiwa mih lai emkaam lane lai thooh dawai neiwi i chnong cha iwi i chnong, katwa ya ki truck mooyong wa wan na Assam da phah ko da ki pulit wow synran ya ki hadooh wa poi thaw.

I wan yong ki truck marbaam na baar toh i wym banse neibhah wym ye i u im khlem baam,

lada ka sorkar ka em ko i kitkhia wa i sñiawlem ya i ki tre ri da toh u ap ko ya i yakhih yong u paidbah ka East Jaiñtia Hills wow pynsangeh noh ya i wanrah ya u mooyong uwa na baar, tangwa sñiawsih u pait u yoo wa ka sorkar MDA ym em ko ka itæ i sur wow pynsñiaw cha ka MHA yeini i pyrchah yong ki paidbah ya u mooyong wa wan na baar wa em i maa na u khñiang COVID-19.

Ini i leh wym bna ka sorkar jylla ya i pyrchah yong ki paidbah da pynsñiawsih ko ya i mynsien yong ki paidbah wow pait ya i leh arsap ka sorkar MDA kawa da booh ya ki paidbah yong ka chnong ka thaw ha i maa du wow lai yaw kitai ki karkhana khyndaw bilat.

Lada ki paidbah emkam Car Pass ki u lai na kawi ka District cha kawi tawon ka District jynjar u yoh Car Pass lada lai khlem Car Pass leh daw chah phah liwan haki pulit, katwa ya ki truck mooyong wa wan na Assam won hap pdiangburom hap synran da ki pulit. Ini i leh yong ka sorkar da pynsuba joor ko ya ka seiñ wa em iyi re iyi cha kylla.

Heijooh i por leh ka EJNC da pynrem joor ko yaki 7 ngut ki MLA napoh ri-loom Jaiñtia kiwa da leh wym sñiaw ya i eh kiwa chong chnong ka ri-loom Jaiñtia.

Ka kyrwoh na u Sambormi Lyngdoh, President EJNC- CEC.

Previous
Next

0 Comments

Leave a Reply