Uwa yahkhmat ka Liang Pyrchah uwa man leh u Montri Rangbah warim ka Meghalaya, u Dr. Mukul Sangma da ong u wa i ujor FIR hajrong i jia ha Mukroh ym toh du wow pynyoo wa da leh iyi iyi tangwa wow pynyoh yei bichaar hok.
U Dr. Mukul Sangma haka 22 tarik hadien wa yoh yutip yei chah siat yap ki 5 ngut kiwa chong chnong ha ki pulit Assam ha Mukroh, West Jaiñtia Hills da lai u cha katai ka chnong wei da yachem leh ya kiwa chong chnong wa ki manyung kiwa da ngat ha i jia wa sñiawsih sñiawkthang. Hadien ini i lai pait ya ka chnong Mukroh, ynnin ka sngi da pynbna wa ka Meghalaya Pradesh Trinamool Congress daw e yarap poisa ko T.5 lak cha ki manyung kiwa khlaad wei kamjooh daw yarap poisa leh cha kiwa da mynsoo hei chah siat ha ki pulit Assam.
Hawa klam wa ki laad pathai khubor ynnin ha Shillong, da ong u wa da yoo boonsien wa kani ka sorkar toh kawa bang du ki nia wei ym jooh leh ko iyi iyi won, tangwa ha kam ini i por wow wanrah biang yei chaniah wei sñiaw chngaaiñ ha ki paidbah da toh u booddien ya ini i kaam lada i ujor toh iwa sakhiat, wei ka sorkar toh u dawa ko leh wow kem ya kitu ki pulit kiwa emkti ha itai i jia umsnaam.
Da ong u leh wa ka sorkar Assam toh u ekti ko ya kini ki bru wa emkti cha ka jylla Meghalaya.
