theme-sticky-logo-alt
theme-logo-alt
Advertisement ad1

Ka sorkar toh u pynhiar ko yei dan phñiang chwa u mih yakhih ki paidbah: P.T. Sawkmie

Advertisement ad1

U MLA ka Congress na Mawlai uwa man leh u Chief Whip yong ka Liang Pyrchah, u Process T Sawkmie da ong u wa kamwa man katni wa emkaam wow pynbait tikna noh ya i dor yong i Petrol wa Diesel wa ym toh wow ku de, wei man ko iwa emkaam wa u Montri Rangbah ka Meghalaya wa kamjooh ki Montri Rangbah yong ki jylla ka thaaiñ Northeast wow pynsñiaw ki ya ini i eh ki paidbah hakhmat u Montri Rangbahdooh ka ri, u Narendra Modi.

Katkam i ong u Process, ka sorkar National Democratic Alliance da rem ko wow phah ya ki karkhana wa pynmih phñiang kiwa booh dor neibhah wa i ku man i iwa cha palat, wei da ong u wa kamwa man katni, ka sorkar u Modi leh da rem ko wow pait neibynta i bha i biang ki bru paidbah.

U MLA ka Congress da ong u leh wa i ku dor yong i phñiang kari Petrol wa Diesel da wanrah yei eh ya ki paidbah neibhah wa ku leh ki marbam mardih, hawa da kylli leh yeiwa suki hi-eh u Montri Rangbahdooh ka ri India, hajrong i eh wa ki paidbah da maad ki.

U Sawkmie da kylli u leh ya ka sorkar Meghalaya Democratic Alliance (MDA) ha ka jylla wa yahkhmat da u Conrad K Sangma kam u Montri Rangbah, heiwa da ong wa ileh wa ka sorkar jylla hawa yoo ko yei chem chitom ki paidbah tangwa da suki hi-eh ya ini.

Da ong wa waroh sñiawthooh ki yei ku dor i phñiang kari toh neidaw wa ku dor i ‘Crude Oil’ ha ka pyrthai waroh kawi, tangwa kamwa man, i dor yong i Petrol ym pu ku hadooh kattæ, tangwa toh wa heh ka dan iwa ktah.

Da ong wa ka sorkar pyrdi ka em ko ya ka Central Sales Tax kawa man hadooh T. 63 katwa ka sorkar jylla leh ka lum ko ya ka dan lyngba ka Value Added Tax (VAT) haduh T.37 chi liter, deiwa pynrap wa toh du ka sorkar India kawa ye u pynbait syndon ya ini i eh deiwa pynduna noh ya ka dan, wei heijooh i por da kyntu leh ya ka sorkar jylla wow pyrkhat neibynta ki paidbah salonsar khlem da kheiñ ya uwa dooh næ mahajon, deiwa pynhiar noh ya ka dan ka VAT.

U Process da ong u leh wa kiwa yah kari kamai waroh da jynjar ki katni neibhah wa hap ki wow pynku leh ya ka bai kari, kawa ktah ya ki paidbah najrong wa ki paidbah da chem ki yei eh nei wan ka khlam COVID-19. Da ong wa i bynta yong ka sorkar katni toh wow wan chakhmat yow pyndooh yei eh yong ki paidbah wei ka sorkar ymtoh u yang hadooh wa ki paidbah u mih yakhih cha sarok.

Advertisement ad1
Share this:
Previous

Dang mut ki tre karkhana Coke waka sorkar wow pynbiej paidbah da ki NOC: ECC

Next

Wai u CEM ka JHADC ya ka Yung Dorbar wa paka ka chnong Nartiang