Ka United Democratic Party (UDP) da ong ko wa ka sorkar toh u pynyoo paidbah ko ya ka bui takit namo ka Report hajrong i pynbaad baam tooh ha ka chnat bordiñ ka jylla.
U General Secretary ka UDP, u Dr. Jemino Mawthoh da ong u wa ka Party nadooh wa sdang ym em u suki ko hajrong ini i pynbaad wei dang booddien ko ki hadooh ynne ka sngi deiwa ong wa ka sorkar toh u pynmih paidbah ko ya iwa da chem na ka takit.
Heiyatoh wa i pynkrehkaam ya ki ‘Smart Meter’, da ong u wa ka Party dadep phah ko yeini i kaam neibhah ki paidbah emkaam u sñiawthooh bha ki heiyatoh wa i rukom krehkaam ki ‘Smart Meter’.
Ha iwi tawon i liang da ong u wa ka Party pyrchah joor wei ym pdiang ko ya ki kaam baam tooh, deiwa pynrap wa nadooh wa sdang ka Party ym em u suki ko hajrong kiwon kiwon ki bynta wa chah pynbaad ka sorkar.
Chooh chooh da ong u wa ki paidbah leh emkaam u sñiawthooh ki wa ka UDP hadooh katwon u kbai ko ha yung dorbar chna aiñ kawa em 60 ngut ki dkhot heiwa ka Party em dkhot ko du 6 ngut ki MLA.
