Ka Meghalaya Joint Action Committee of Commercial Vehicles (MJACCV) ynne ka sngi da khut ko wow pynman yakhih deiwa dam u mih ki kari 48 kynta hadien wym bien ka sorkar wow khut yaklam yaki. Hawa yaklam wa u Symbood Montri ka jylla u Prestone Tynsong, da ong u wa ya ini da ekti ha ki DC wow pynbait ki wow khut yaklam wei ini u lai chwa i ha ki kyrdan ki bor District.
Hawa kylli won wa ka MJACCV kyntait ki wow yaklam wa ka DC deiwa dawa u yaklam waka sorkar wow pynduna yaka dan phniang kari kamjooh wow maap yaka bai ki kot ki sla kamai kari, neiliang u Prestone da ong u wa hawa wan yachem ki wa oo da ong u yaki wow e laad yaka sorkar wow leh ya iwa emkaam wei da pynhiar ko ya i dor i Petrol wa Diesel da ar tyngka.
Da ong u leh wa ka sorkar dang pait ko ya ini neibhah wa i dor phniang ha pyrthai dang ku ma ku i wei kammon ka sorkar u leh ko yow pynduna chooh chooh yei dor.
Heiyatoh waka dan (Cess) wa T. 31 wa booh ka sorkar kawa ong ko toh da pynemkaam haka puræ puthi kawa hadooh kiwa sikai skur leh da phylla ki, neiliang u Prestone da ong u wa kani ka poisa ym toh kawa lai cha ka kata ki Minister wei na kani ka Cess kawa da yoh kawa da poi palat 300 klur tangwa ka poisa wa emkaam neibynta ka puræ puthi da poi ko T. 1200 klur kamtæ toh u sñiawthooh ym toh wow klam khlehbiej wei lada kwah ye wow leh daka RTI wei najrong ini hap leh wow e yukheiñ man-ka-snem kawa hap u mynjur daka CAG.
Da ban joor u leh wa dang puræ bniah ka sorkar ya ini waroh wa kiwi ki chnat sorkar yow ye u chim yaka rai kammon wow pynhiar dor wei yeini daw tip haka tayaw wow wan deiwa pynrap leh toh u duna i dor Petrol wa Diesel ha Meghalaya bar yaka Assam kamwa jooh leh hi.
Da kyntu u leh ya kiwa yakhih wow sangeh chwa yaka yakhih neibhah ka sorkar leh chimkhia ko ya kani ka kaam.
Heijooh i por da ong u leh wa lada ym sangeh ki ka sorkar ye ko wow e noh da ki Permit cha kiwi kiwa smat wow wan chakhmat yow kamai.
