U Symbood Montri Rangbah ka jylla, u Sniawbhalang Dhar da thalaiñ u ya ka seiñ ki Hindu na Assam, ka Kutumba Surakshya Parishad (KSP), deiwa ong wa ka sorkar ymtoh kawa kreh deiwa chah maham ha kiwon kiwon næ ki seiñ wei ym em kiwon kiwon kiwa ye wow chim ya ka aiñ ha kti yong ki hi.
Ini i ong u Sniawbhalang toh hawa kylli yei pteiñ ka KSP wow maham khang ya u sarok wa psiah cha Meghalaya lada ka sorkar ym wai noh ko ya ka krem Mawjymbuiñ, ha Mawsynram hapoh ka 23 tarik uni u Kmaichonglad (Dec) yow lai mane ki Hindu.
Hawa klam wa kiwa thoh khubor, u Sniawbhalang da ong u, “Ka sorkar ymtoh kawa kreh deiwa em kiwa maham ha kiwon kiwon wei ym em wa ye u chim ya ka aiñ ha kti wei lada em phi iyi iyi wa yatoh wa ka jylla, u bichaar i yeitæ, ymtoh iwa em iwa eh”.
Da ong u wa ki bru kiwa na baar ym em hok ki wow maham næ wow e por ya ka sorkar Meghalaya, wei toh u tip ki yei rukom mantre ya i khyndaw u chyiap hapoh ka jylla.
“Kitæ toh kiyi? Toh u tip ki yei rukom mantre yei thaw i bhaw ha kani ka jylla wa toh da ki paidbah, wa mantre da ki bru samen wei lada kwah wow leh iwon iwon leh chong ha ki tre thaw”, da ong u.
“Hawa yatoh wa ki kaam khyndaw kiwa em ha kti ki chnong wa ka Hima, toh u ya pynbait wa ki”, da pynrap u Sniawbhalang Dhar.
Kam wow pynkynmoo wa ka seiñ Hindu na Assam, ka Kutumba Surakshya Parishad (KSP) ha ka 17 tarik uni u bnai da maham biang ko ya ka sorkar jylla wa toh u wai noh ya ka krem Mawjymbuiñ hapoh ka 23 tarik uni u bnai, khnang wa ki Hindu u yoh ki wow lehniam, lym kamtæ ka Meghalaya daw hap ko wow maad yei chah pynkhang sarok.
Discussion about this post