Da: U Khroo L Pariat
Dei bor yong ka Syiem Myntdu ha ka Syntu Ksiar wa i e bor e mynsien ka men Rimai Nangbah ka bei u Kiang; ban sei chah tynyap u woh Ksan u Kni u yong oo, pynryntih ki ya i manbru longbru u Kiang. Kamtæ yow im wa yow nang chngaaiñ ka manbru longbru, na madan madiah kmai Blai pynkhai pynyieñ won u ya ki khmat chynrang khmat kynthai kiwa man kiwa ha yung, ki kur ki jait kiwa kha wa man ki yong phi ki yong nga hi. Ryntih ki hadooh wa soo wa lieh wow ekti ki yei rynyieñ i yong ki hadooh wow laitlooid war i pyrkhat, i rynyieñ ka pateiñ ka yong i ha kitu ki snem nei chah synchaar lehbor wow pyndooh ka sorkar British ki dohlieh ya ka jait ka kur ka yong i.
Kynmoo, u Kiang ym em khlaad u dei mon i yong oo, tangwa neidaw wa khwan wa rhah i yong u Dolloi u Manik Pakynteiñ (uwa siñ ki u Dolloi tyngkeng neidaw wa dor ki khawah u) baam poisa u chirup wa u Long Sutnga.
Kamtæ ki British dei bor, pasi ki oo u Kiang hadooh wow khlaad i rynyieñ u na i neini, tangwa i mynsien i naam u Kiang im i, wei wa toh u nang im chooh chooh i kliaw hei pyrkhat i yong i hadooh katni.
Ha oo da yoh laitlood ka pateiñ ka yong i ha katai ka por. Tangwa yow lait ka kynthai ka khynnah wa ka jait ka kur, u yieñ u im ha synrang hei tyrma. Kyntu oo ya kani ka pateiñ ka yong i kawa katni kawa dang em mynsien dang em i sñiaw, toh u khai u yieñ biang i sachisien yow pynlaitlooid won samen samen nei man broo, iwa kdoh wa chah khoom ha ka pyrkhat ka pyrdaiñ ka khwan poisa ka rhah bor, u myntoi u im samen samen. Khamtam ha tawiar ka Syiem Myntdu.
Seisien khai, yieñ dap chynrang dap kynthai i kam ki pateiñ khon pateiñ ksu u Ynñiawtrep, i doh i snam u Kiang ha kani ka beirymaw ha ka ri India yong i, ham swe ham tlar chirup yow eh rngu, yow khih yow im ka jait ka kur ka yong i waroh yow laitlooid ko nei chah yoo beiñ, nei chah lehbeiñ ha ki khwan poisa ki wa rhah bor.
