Da: U Shimphang Lyngdoh, Lumputhoi EJHD
Aa! chnong Jwai chnong wa maya,
Da ki tayaw ki bnai neh kani ka thma;
Yei jhep u khat kopsar wym em de,
Da ieh syngngait kamni hawa doom wa che.
Yei thaw u linoh wym em de kiwa chah,
Kat chawa kyruiñ da khang lut ki paidbah;
Wot hadien wada pynsñiawthooh ya ki,
Dap hi-eh paya sadu i atnood bichni.
Katkaam i tip wa khian yong nga,
Kwah oo u e da ki yumut wa bha;
Cha phi ki nong Jwai wada chem yei eh,
Da kani ka laad ya phi da toh u leh.
Phah ya kiwa chong chnong manla ki thlu yung,
U pynlang ki yei Plastic jar jiar i yung;
Ki jhep wa pyut noh ki cha kpær,
Ne u e baam sniang deiwa chet-ber.
Ya kiwa chong dukan u leh phi i jooh,
Khnang yow yoh ki yei sñiawthooh;
I krehlang yong ki toh iwa emkaam bha,
Yow ye u wanrah yei kylla.
Sait khooid ya ki Plastic wada pynlang,
Thaad sngi ya ki hadooh wa rkhiang;
Jied iwi i thaw wow pynlang ya ki,
Iwa lait nei jhieh yow lait u smat tung ki.
Manda dap da khynnia ka thaw booh Plastic,
Phah cha ki karkhana wa ye u wan kit;
Cha Lumshnong ha ka Dalmia Company,
Yoh u khooid i jhep na ka chnong yong phi.
Naka Swatch Bharat Mission ye phi u paan yumut,
Lada em sakhiat ha phi i raikut;
Pynsñiawthooh paidbah yeini i kaam,
Lyngba ini i yutip wa khian chaphi kwah oo u saam.
