theme-sticky-logo-alt
theme-logo-alt

Lait ka chnong Lumpuhtoi nei jhep Plastic deiwa krehlang ka Dalmia Cement

Kiwa chong chnong ka Lumpuhtoi kawa em ha East Jaiñtia Hills District da pynyoo ki yei stat wa i che yong ki wow khyrngiat smat yow yaleh thma pyrchah yei jhep Plastic deiwa yatylli kam ka chnong yow man leh ka nongmuna ya kiwi ki chnong ki thaw kiwa da kwah wow lait nei jhep Plastic iwa boon ki por da man ki chiteiñ na waroh i jait jhep wa mih na ki yung ki sem kamjooh leh na ki yaw ki haat.

Kam chibynta wow lait nei jhep Plastic, ka chnong Lumpuhtoi da pynchlur ko ya kiwa chong chnong wow pynlang yei jhep waroh chi snem wei ha ka 2 tarik u Naichiphaw wa man leh ka sngikha u Mahatma Gandhi, ka chnong da pynman ko da ka yakob heiwa da thaw khia yei jhep wei kiwa pynlang boon dooh da yoh ki da ka song poisa.

Ya ini i jhep Plastic da jied da pynlang ha kylleiñ soodong ka chnong wei da sait khooid wei thaad sngi ki leh kamjooh. Hawa yaklam wa u General Secretary ka chnong, u Shimphang Lyngdoh, da ong u wa lakam wa thaad that ha kylleiñ ka chnong hawa leh kiwa chong chnong yeini wei hadien wa pynman ya ka yakob da booh ya kini ki jhep Plastic hapoh churia ha kdong ka Community Hall ka chnong wei neidaw wa dadep sait dadep thaad sngi ym em sma ki leh kini ki Plastic.

Chooh chooh da pyntip u wa da kynjoh ktien ki ya ki karkhana pynmih khyndaw bilat wa em hapoh ka District heiwa ka Dalmia Cement da bien ko wow lai kit ya ini i jhep Plastic iwa da tam 100 churia.

Ka Dalmia Cement leh kmen ko wow yoh ya kini ki Plastic kiwa da dep pynkhooid wei kiwa dadep pynrkhiang neibhah da stiñ ki wow kit wei kamjooh leh manda thang man ki kiwa kop diñ bha ym toh kam kitu ki Plastic wa dang em ki jakhlia wei kiwa jhieh.

Neiliang u Shimphang da pyntip u wa ini toh dang i sien wa nyngkong wa da wan kit ya kini ki jhep wei neiliang ka chnong leh u pteiñ ko u leh yeini i kaam yow man ka chnong leh kawa lait nei jhep heiwa kamwa man katni waroh ki jhep wa ye u pyut da chet baam sniang ki wei em leh kiwa da noh cha ki kpær yow man ki kam i sboh.

Da ong u leh wa hanla ym ye u lait lut na waroh ki jhep Plastic hapoh ka chnong tangwa u pyrchang katwa ye wei yooluti u leh wa kiwi ki chnong u bood ki ya kani ka luti.

Ka chnong Lumpuhtoi toh kawa em 125 tylli ki yung wa duna 800 ngut kiwa chong chnong.

Puræ leh: E khusnaam ka Lumpuhtoi cha kiwa jop ha ka yakob pynlang Plastic

Share this:
Previous

Ka Thma Jhep!

Next

U Chanki Langbang kam u Dolloi wa thymme ka Elaka Shangpung