Hawa chong bichaar ya ka mukotduma wa yaleh da ka High Court ka Meghalaya hi heiyatoh wa i tih mooyong pyrchah aiñ ynnin ka sngi da ka miej bichaar u Justice H.S. Thangkhiew, Judge wa u Justice W. Diengdoh, Judge, neiliang ka sorkar jylla da wanrah ko leh ya ka Status Report katkam ka hukum wa da pynmih ha ka 24-02-26.
Neiliang u Advocate General, u Dr. N. Mozika da pyntip wa heiyatoh wa ka poisa yarap cha kiwa na Nepal kiwa da yap neiwa jia ha ka krem mooyong ha Mynsngat-Thangskoo, da leh da ka sorkar jylla deiwa ya krehlang wa ka Ministry of External Affairs yow chem ya kiwa emyatoh kiwa da khlaad wei kamjooh leh ya kiwa na Assam heiwa da phah kot cha ki DC yow yarap ki wow tipmit ya ki metyap wei ya kiwa tipmit dadep wow su.
Da pyntip leh wa da booh ki kyndon takit ka Commission of Inquiry wow pait ki yei emkti kiwa thied ya u mooyong kamjooh kiwa chalan ya uni u mooyong wa da tih pyrchah ya ka aiñ wei kammon leh kini ki bru kamjooh ki bru wa em hei bor deilang ki NGO, wei wow tyrwa cha ka sorkar kammon wow leh yow khanglaad yeini.
Chooh chooh da ong wa da thung ya u D.N.R. Marak, IPS, Inspector General of Police, (Law & Order) wow khlieh ya ka Special Investigating Team (SIT).
Heiyatoh wa ki Case kiwa da Register, ki Charge Sheet kiwa dang sahteiñ kiwa yatoh wa i tih mooyong pyrchah aiñ, i chalan, ki tiar tympdung wa kiwi de, neiliang u Advocate General da paan por u soo tayaaw.
Hajrong won i jia ha ka 4 tarik heiwa da em kawi ka Truck kit mooyong kawa da kylla wei da ban ko ya ar tylli ki kari ha East Jaiñtia Hills heiwa da em kawi kawa yap, neiliang u SP uwa da emlang hapoh ka yung bichaar da sai u ya ki Delivery Challan wa ki kot ki sla wa pynyoo wa uni u mooyong toh uwa da thmu wow lai pynhaap ha kawi ka Cement Plant wa em ha Lumshnong wei ya uni u mooyong da wan kit na Assam wei ymtoh uwa man pyrchah aiñ.
Discussion about this post