theme-sticky-logo-alt
theme-logo-alt

Ka UCC daw pynmadan ko ya ki ri-loom: NESO & KSU

Advertisement ad1

Ka North East Student’s Organisation (NESO) wa ka Khasi Student’s Union (KSU) da pynsñiaw ki wow pyrchah bait yei thmu ka Bharatiya Janata Party (BJP) wow pynkrehkaam ya ka Uniform Civil Code (UCC) næ ka aiñ wa yatoh wa i chongkurim, i pynlait kurim, hiar pateiñ (Succession) wa i kam khon (Adoption).

Ya i thmu wow wanrah noh ya ka Uniform Civil Code da klam da u Amit Shah ha ka yalang yong ka BJP ha Bhopal, ha ka 22 Naitung uni u snem. U Amit Shah da pynsñiaw u leh wa ya ini i thmu daw sdang na Uttarakhand wei wow poor won cha kiwi ki bynta ka ri.

Advertisement ad1

U Chairman ka NESO, u Samuel Jyrwa da ong u wa i thmu wow wanrah ya ka Uniform Civil Code (UCC) toh iwa da rim bha, ym du tang da ka BJP, tangwa da ka Rashtriya Swayamsevak Sangh (RSS). Da ong u wa ka ri India toh ka ri wa em da ki hajar ki jaitbru kiwa em jar jiar i rukom im, wei i thmu wow wanrah ya ka UCC toh wow pynmadan noh ya ki ri-loom wei wow pynman noh ya kiwi wow bood lang ki.

Da ong u wa lada wanrah ya kani ka aiñ, ka NESO daw pyrchah wei i pyrchah daw mih i ha kylleiñ ka ri.

U President ka KSU, u Lambokstarwell Marngar da ong u wa ini i rukom pyrkhat ka BJP wow wanrah ya ka jooh ka aiñ (UCC), ymtoh wow phylla neibhah i thrang ka sorkar BJP toh wow pynmadan bait.

Da ong u wa lada ka sorkar BJP pyrkhat ko kamtæ, daw yah ko ya ki khynroo wow lai da kawi tawon ka luti kiwa ye wow mynsoo, deiwa pynrap wa katkam ka riti synchaar ka ri, da kdaw che wow burom ya waroh ki jait niam ki jait ktien wa ki rukom im.

Da ong u wa ka seiñ kamwa pyrchah ko ya ka CAA hadooh katni, kamjooh daw pyrchah ko ya ka UCC wei ka seiñ daw yaklam yillu ko hajrong ini wa ka NESO.

Share this:
Previous

Super Division: Jop ka Khimusniang

Next

Shillong Premier League 2021-22: Jop ka Rangdajied ya ka Mawkhar