Jowai : Ka yaleh final ka 1st Division kawa tip leh kam ka 6th Chatister Kharkongor Memorial Trophy da poi ko cha wa kut ynne ka sngi heiwa da yaknieh yei naam jop ha pyrdi ka 7 Wasa wa ka Demthring.
Kiwa boon hi da yooluti ki wa u jop ka 7 Wasa tangwa ka Demthring ym em e laad ko yeini heiwa ha ka kylla step ka Demthring da thap ko ar tylli ki kool ha ka minit wa 27 lyngba u Primrose Lamat wa ha ka minit wa 37 lyngba u Spain Ryngkhlem katwa ka 7 Wasa da yoh ko u thap du chi kool donhi ha ka minit wa 12 lyngba u Pynishai Lathong. Kamtæ ka kylla step da kut ko 2-1.
Ha ka kylla miet ka 7 Wasa da yoh ko u thap sa ka wi ka kool ha ka minit wa 46 da u Blessing Pamthied wei da yoh ko leh ya ar tylli ki penalty ha ka minit wa 66 wa 69 wa thap da u Felixson Bang wa u Chandra Pakyntein tangwa ka Demthring ym em ieh jem ko wei da su biang ko sa chi kool ha ka minit wa 78 lyngba u Kyrkhu Ryngkhlem wei kani man ko ka kool wa khaddooh ha kani ka yalehke.
Kamtæ ka 7 Wasa da jop ko da 4-3 wei ha kani ka kynti ym em rem ko tang chisien leh.
Ha kani ka sngi da saam leh ya ka khusnaam Top Scorer cha u Felixson Bang, Best Goalkeeper cha u Kitbok Laloo, Man of the match cha u Blessing Pamthied waroh le ngut na ka 7 Wasa katwa ya u Player of the Tournament won da yoh da u Primrose Lamat yong ka Demthring.
Discussion about this post