Jowai : Ka All Jaintia Hills Social Welfare Organisation (AJHSWO) kam chi bynta wow pynsñiawthooh paidbah yei roi i kjut AIDS wa kamjooh leh i riñ i dih drugs ya ki bru da pynman ko ya ka yalang paidbah ka wa tip kam kam ka ‘Awareness Programme with regards to HIV/AIDS and Substance Abuse’ ha kani ka 4 tarik Khonchonglad ha Community Hall, Loompyrdi Mimyntdu, West Jaintia Hills Distrct.
Ya ka yalang ha kani ka sngi da pyllai da u ma Jrom Biam Rangbah Dong Loompyrdi Mihmyntdu, heiwa u kongsan ha kani ka sngi toh u Sub Divisional Officer ka Public Health Department (PHE) Electrical Division u ma Paul Synnah.
Ha kani ka programme da wan wow pynche paidbah da ki bru chemphang hajrong i kjut HIV/AIDS da ka kong R. Rymbai, District Health Educator West Jaintia Hills District, heiwa da ong ko wa i yachong kurim khleh toh i daw wa roi bha i kjut HIV.
Katwa hei yatoh wa i kyrni i kaam dih Drugs namo kiwon ki jait dih wa pynmuaid da batai da ka kong D. Bareh na ka Voluntary Health Association Meghalaya (VHAM), kawa da batai bniah hajrong katwan ktah ne pynsih ko ya kiwa dih Drugs nadooh kiwa ha yung hasem kamjooh ya i doh i pran hdooh i jabien yong ki.
U kongsan hei klam yong oo da ong u hapoh ri India katni da ki phaw lak ngut ki bru rah ki ya ini i kjut HIV/AIDS. Na ka liang ka sorkar ong u wa da chna ko chiboon ki lad ki luti yow ye ki bru u yada na kani ka kjut kamjooh wow yarap ya kiwa yoh ya ini i kjut.
Hei yatoh wa i joor won ki wa dih Drugs wa ki wi ki jait dih u ma Paul ong u wa joor i khamtam ha ki wa dang kynroo, neitæ i daw hap syndong bha ki yow ye u lait nei pynchoi u pyrchang mad ya ki Drugs neibhah chisien da riñ ko da eh u lait na i chah kdoh ha ki Drugs.
Da yoh leh i klam na u Waheh Chnong Mookaswan u ma Bloin Shylla, u Whaheh Chnong Sabah Muswang u ma Bei Shylla, u khynroo Ram Biam President AJHSWO, u Waheh Chnong Ialong u ma Bishar Shylla wa kiwi kiwi. Ha ka tai ka sngi da emlang wa ki khynnah skur ka Mihmyntdu Secondary School deilang wa ki nongsikai
Discussion about this post