Jowai: Chibynta wow pynkrehkaam hajrong ka thong yong ka National Tobacco Control Programme (NTCP), heiyatoh wow pynsñiawthooh yei ma wa mih nei baam duma, i dih sikret, wow pynduna i pynmih wei pynlai yaw ya ki, kamjooh wow yarap yaki bru u yait na kini nalor kiwi won ki thong, kamtæ ynnin ka 29 tarik da pynman yei yachem yumut hajrong kani ka thong ha Conference Hall DC, Jowai kawa da tip kam ka District Level Coordination Committee Meeting, Orientation Programme for Stakeholders West Jaiñtia Hills District.
Ha kani ka yachem yumut wow yakhun pyndooh næ pynduna yei baam duma dih sikret, da emlang nadooh u Deputy Commissioner ka West Jaiñtia Hills District u Garod LNS Dykes, u Superintendent of Police ka West Jaiñtia Hills u Lakador Syiem, u DM&HO West Jaiñtia u Dr. K.C. Ajar nalor ki Doctor, Head Teacher wa kiwi.
Neiliang ka Dr. Lana E Lyngdoh Nongbri, State Nodal Officer, National Tobacco Control Programme, hawa e yei klam hajrong ka phang ‘Epidemiology of Tobacco Use and National Tobacco Control Programme (NTCP)’ khana ko wa kam kani ka program da pynman kamwa 4 sien haka jylla katwa haka District won dang kani man ka sien nyngkong.
Da ong wa ia kani ka program National Tobacco Control Programme da mang wow pynman ha waroh ki district yong ka ri, wei yei pynkrehkaam næ i pynlai won haki District, Sub-District hap ko hapoh ka chatri i pait yong ka National Health Mission (NHM).
Da ong haroh ko wa u duma ktah bha u yei chait i khiah yong ki bru, kamtæ wymtoh u pyrkhat i du ya kitu wada myllien ya oo, tangwa wot ha ki khynnah leh neibhah ha kini ki sngi maad ki oo nadooh i rta wa dang khian.
U Lal Sanglien State Programme Officer NEIGRIHMS, Shillong Department Community Medicine, da batai u yaki thaw paidbah wym toh rukom u dih sikret iwa man pyrchah yaka aiñ, nalor wada batai haroh u yaki aiñ ki kyndon nalor ki kuna wa ye u daiñ ya kiwa tyngkheiñ aiñ.
Neiliang ka Dr. V.J. Laloo Specialist (Community Medicine) Office of DM&HO West Jaiñtia won da klam ko hajrong ka phang Epidemiology of Tobacco Use, nalor kiwi won wa e yei klam.
Discussion about this post