Ynnin ka 14 tarik, ka Khasi Students’ Union (KSU) Narpuh Circle hapoh i yahkhmat u KS Suchiang President wa u S. Bamon, General Secretary da lai yachem ki wa u Deputy Commissioner ka East Jaiñtia Hills u E. Kharmalki wow booh ujor hajrong i toor pood ka Assam kiwa wan wow khloh moo pyrchah yaka aiñ na wah Malidor kawa dang haap hapoh u pood u ang ka jylla Meghalaya.
Neiliang ka seiñ da kyntu ko ya u DC wow booh ya ka Police Outpost wa chipor ha yingkieñ Malidor khnang yow ye u sonteri yei toor pood wei tih moo ki nong Assam na katai ka wah.
Ka seiñ da pyntip ko leh wa la katwon sien wa da dep beh wei maham ya ki nong Assam wow tih moo na kani ka wah, tangwa ym bna ki. Ka seiñ da dep ko leh wow ujor hapoh Umkiang Police Patrol Post wei da phah lang yaka cha u Ranger Forest Officer Umkiang Range, Apha kamjooh cha u Divisional Forest Officer (Territorial) Jowai, West Jaiñtia Hills wei chadooh u Montri ka chnat Forest & Environment Department yong ka sorkar jylla wei da pyntip leh cha ka chnat pulit wow lai pynsangeh ya katai ka kaam, tangwa wot hadooh katni ki nong Assam dang pteiñ ki wow khloh moo.
Kamtæ da ong wa ini pynyoo yei buit ka Assam wow yoh u ngooid ya i thaw ka jylla Meghalaya kamwa da sakhi ha kylleiñ ki thaw khappood. Heiwa katni ki bru Assam da chna syndon ki da u sarok hadooh cha ka wah Malidor mar hajan ka yingkieñ iwa da pynchrai ya kiwa chong chnong Ratacherra heiwa haka 13 tarik uni u bnai da mih paidbah ki wow khanglaad ya itai i pynkreh ya u surok wei da pynpra pyntyllung da ki moo wa heh hapyrdi sarok.
Ka seiñ da ong ko wa ka sorkar Meghalaya ym toh wow suki hi-eh ko ya ini i leh embor ka Assam heiwa u DC da chimkhia u wow phone wut wut cha u SP, EJH wow dawa booh Police Outpost wa chipor ha ka yingkieñ Malidor hadooh wa poi i por lyiur. U DC da kular u leh wow phone ya u DC ka Cachar District yow phah pynsangeh chisyndon. Ka seiñ leh da ong ko wa ym chong kli kti, tangwa daw pait ko wow yada ya u pood u ang wa i khyndaw i chyiap wym lai i cha ka Assam wot chi inchi leh.
