Jowai: Ka Nartiang Police Investigation Center (PIC) mynstep ka 11 tarik daw pynku kyrdan noh ya ka cha ka Police Station heiwa daw wan u Mukul Sangma kam u kongsan wow wai ya ka.
Ka Nartiang (PIC) da booh nyngkong ya ka deilang wa ka ophis ka PWD(R) wa em ha Nartiang heiwa da em u wi u Sub Inspector, u wi u Head Constable wa ynnru ngut ki Constable. Hadien neini won da kyrriah na ka ophis ka PWD cha ka yung ka Bilsimai Phwa ha jan ka yaw Nartiang.
Ha u snem 1995 ya ka PIC da kyrriah biang ya ka sa chisien cha i yung ka Niwan Shadap iwa da neh ko hadooh katni.
Deiwa duna kiwa kreh kani ka PIC da lai ko cha khmat la 44 snem wei da chakri ko ya ki 60 tylli ki chnong wei da yarap ko wow yada ya ki paidbah wei wow kem ya kiwa tyngkheiñ aiñ wa kiwi kiwi.
Katwa dang lai ki por ki chnong wa ki paidbah dang boon ki kamtæ da pyrkhat wow pynku kyrdan noh ya kani ka PIC cha ka Police Station wei yeini da phah yutip cha ka Police Headquarter ha u snem 2014.
Kam ka Nartiang Police Station won daw chakri ko ya 110 tylli ki chnong wei ka Saitsama Police Outpost wa ka Khanduli Battalion daw em ki hei pait i yoo kani ka Police Station.
U pood u ang kani ka Police Station da poi ko chadooh khappood ka Ri-Bhoi, West Hamren District Assam wa ka East Khasi Hills.
Discussion about this post