Jowai : Neiliang u Wyrta kwah i u pyntip ya phi wa u Deputy Commissioner wa thymme ka West Jaiñtia Hills u Ryntihlang Rapthap, IAS da chimkti u ha kani ka na 31 Duyatra 2017.
Hei yoh u yaklam wa u DC thymme da ong u wa oo kwah u kreh yow wanrah yei chongsuk chnongsaiñ hapoh ka district, yow pyndep ya ki kaam wa sah hapoh ka district wei yow wanrah yei khooid i jngiar hapoh ka chnong Jowai hadien wa yoo khamtam ka Iawmusiang man ko kawa tngit bha heiwa da noh wei brait jakhlai ki bru kat cha wa yoh.
Da ong u leh wa kwah u wow yada ya ki um ki wah wa da jakhlia na ki tngit wa mih na ki yung ki sem ki bru.
Kattu katni kajiak chaphang u DC
Ya u Ryntihlang Rapthap da kha ya oo ha ka 17 Naisan (May) 1968 ha Mawlai, Shillong wei da pyndep u ya i lai skur yong oo na Seng Khasi Higher Secondary School.
Ya ka Graduation da pyndep u na St. Anthony’s College, Shillong deiwa leh Honors u ha ka subject Maths wa Physics wei da pteiñ u sa ka Master Degree ha ka subject Maths tangwa da ieh noh u ya ka puræ ha ka 3rd Semester hadien wa man kam u MCS.
Nongkong da kreh u kam u Extra Assistant Commissioner (EAC) ha Nongstion, West Khasi Hills District nadooh u snem 1994 hadooh 1996.
Nadooh u snem 1996 hadooh u snem 1998 won da kreh u kam u EAC ka Mawshynrut Administrative Unit wei da man u leh kam u BDO ka Mawshynrut Block.
Hadien ini nadooh u snem 1998 hadooh u snem 2001 da kreh u ha Nongpoh, Ri-bhoi kam u EAC wei kamjooh u In-charge ka Patharkhmah Administrative Unit.
Da poi u cha Jaiñtia Hills district ha u snem 2001 hadooh 2005 kam u SDO ka Khliehriat Civil Sub-Division wei da pynku kyrdan ya oo kam u Additional DC.
Nadooh u snem 2005 hadooh u snem 2009 won da poi biang u cha Nongpoh, Ri-Bhoi kam u Additional DC.
Da pynku kyrdan biang ya oo ha u snem 2009 heiwa da man u kam u Secretary MPSC wei da man u leh u Joint Secretary ka Personnel & AR (B) Department nadooh ka 31 Naichiphaw 2016.
Ha u Duyatra (January) 2016 da yoh nomination u kam u IAS.
Discussion about this post