Jowai: “Dap i dei mynsien wa sñiawkhia hadien wa ki karkhana khyndaw-bilat kam ki wa ka sorkar em ko chirup wa ki wei ym em wa ye wow leh ya ki iwon iwon leh,” da ong u Nidamon Shullet uwa man u President ka Jaiñtia Hills Truck Owners Association (JHTOA) dei mynsien wa sñiawsih wei dap umkhmat.
Yeini da ong u Nidamon hadien ka yalang ka Joint Action Committe (JAC) ynne wow pyrkhat hajrong wow dawa pynkrehkaam ya i dor thymme wow kit mar wa da pynmih ka sorkar na ki karkhana deiwa rai leh wow sangeh noh wow kit ya ki mar na kamjooh cha ki karkhana pynmih khyndaw-bilat.
Da ong u wa ini i kam ki karkhana wa ym em wa ye u yaleh wa ki neibhah wa ka sorkar em ko wa ki, man i iwa ymye u ngait wow pdiang.
U Shullet da kylli u leh wa hoi hi mo wow yap ki bru kiwa im neini neibhah boon na ki tre truck hi toh ki tre jylla.
Da kyntu u leh yaka sorkar wow ban joor wow pyntikna wa krehkaam ka hukum yong ka neibhah kini ki karkhana pynmih khyndaw-bilat waroh krehkaam ki katkam ki aiñ wa ki kyndon ka sorkar wei ka sorkar ymtoh de u dooh ko yei chaniah ki paidbah ka jylla khamtam ka Ri-loom Jaiñtia.
Yeini waroh da ong u Nidamon hadien wa kut ka yalang ka JAC wa kynthup ya ka JHTOA, ka Jaiñtia Cement And Clinker Transporters Association (AJCCTA), ka Meghalaya Truckers Union (MTU) wa ka All Jaiñtia Cement Manufactures Association (AJCMA) heiyatoh wow pynkrehkaam ya ka hukum ka sorkar wow pynthymme ya i bai kit mar ki truck.
