Shillong: U President ka Bharatiya Janata Party (BJP) Meghalaya, u Earnest Mawrie da ong u wa lada ki dkhot ka Hynniewtrep National Liberation Council (HNLC) smat ki wow wan chakhmat, neiliang ka Party daw chim ko yei kitkhlieh wow yachem u yaklam wa u Home Minister ka ri India, u Amit Shah.
U Mawrie da pynsñiaw u leh wa ka sorkar jylla toh u khut yaklam noh ko yaka HNLC, wei kam ka Party kawa emlang haka sorkar Meghalaya Democratic Alliance (MDA) daw kyntu ko yaka sorkar wow khut yaklam khnang wa i chong suk u em ko haka jylla.
Uwa yahkhmat ka BJP haka jylla da kam u leh wa hadien wa chimkti ka BJP ya i synchaar hapoh ka ri, ki kaam pyrchah ri da hiar ki kamwa 70% wei i dooh ki mynsien yong ki bru paidbah da hiar cha 79%, naka chnat pulit wa chipai da hiar cha ka 17%.
U Ernest Mawrie da ong u leh waka BJP Meghalaya kwah ki ya i suk hapoh ka jylla wei neidaw ini u smat ko wow pyntip leh cha ka sorkar bei hajrong ini i thrang ka HNLC wow wan yaklam yasuk waka sorkar Meghalaya deilang waka sorkar bei.
