U Director warim ka NEIGRIHMS u Dr. DM Thappa haka kyrwoh wa da phah u, da ong u wa ka Central Bureau of Investigation (CBI) kawa pynman yaka takit heiyatoh wa i jia hapoh ka Cardiology Department kani ka thaw sumaar heiwa da em i suba wa da em i leh thok yow chna poisa yaki tiar wa emkaam kiwa chitom klongsnam iwa da leh da u HOD Cardiology, Dr. Animesh Mishra.
Ini da wanrah ko wow pynman yaka Meghalaya High Court wow phah kem ha u bnai May 2019 ya ki tiar wa chongdor T. 32 lak wa kynthup yaki Stent, Pacemaker wa kiwi ki tiar (Surgical Implants) na Sanjo Pharmacy (ka Private Pharmacy kawa pynlai da ka kurim u Technician hapoh ka Radio-diagnosis Department) wei hadien i takit ka CBI hapoh ka Cardiology, Orthopaedics wa Radiology wei kam chibynta ka Anti-corruption All India Drive da paan bor ki naka Ministry of Health and Welfare, New Delhi wow lai chakhmat yow pyndep ya kani ka takit. Wei u Dr. Animesh Mishra da lai u man ka por cha ka yung krehkaam ka CBI yow khang noh ya kani ka Case, da pyntip u Dr. Thappa.
Da kam u leh wa u Dr. Mishra da phah u yaka Sanjo Pharmacy wow lai cha ka Cath Lab hapoh ka Cardiology Department man ka sngi yow pynbiang yaki Stent, Pacemaker wa kiwi ki tiar (Implants) hei dor wa syad wei da pynkrehkaam ki ya ini yow ya sooh buit yow chna poisa. Wei ya ini da leh la 10-12 snem katkam wa khana ki DM Cardiology Students kiwa em leh wa booh ha YouTube. Chooh chooh da kam leh wa ki arngut kiwa krehlang wa u Dr. Mishra; u Dr. Manish Kapoor, Associate Professor wa Dr. Amit Malviya, Assistant Professor man ki leh kiwa embynta lang ha ini hapoh ka NEIGRIHMS.
U Director warim da ong u wa heipor wa yaleh u wow pynmih pyrthai ya ini wa jia, da pynyoo pathan ya oo daka dwar wow mih noh napoh kani ka thaw sumaar katwa ya kitu kiwa leh bakla won da yada yaki. Da ong u leh wa yaka AMRIT Pharmacy ym em pynemkaam yaka kawa toh u pynbiang ha ki tiar hei dor wa duna cha kiwa chah sumaar ha kani ka Hospital. Wei hadien wa rah ya ini hakhmat ka Ministry of Health and Family Welfare, Nirman Bhavan, New Delhi nadooh u 2017 u 2020, ya u Director da phah ya oo wow yatoh lok wa u Dr. Animesh Mishra. Wei manda mih khubor ini waroh, kiwa yajan wa u Dr. Mishra ha NEIGRIHMS da pynbaad ki wa u Director da pynsih u yei dur yei pyrtuid kani ka thaw.
Da pyntip chooh chooh u wa ki Pharmacy wa pynlai daka NEIGRIHMS da khang yaki ha u 2016-17 yow wai noh da ki yong ki bru samen “Life Care Pharmacy” hapoh u pood u ang kani ka thaw deiwa yarap u Deputy Director Administration (DDA) wa katni u David T Umdor (iwa man leh pyrchah yei e buit u Director In charge Dr. Prithwis Bhattacharyaa). Katni yaka AMRIT Pharmacy da pyrchang wow khang yaka deiwa yarap lang ki Private Pharmacy wa u DDA.
Da pyntip leh wa hadien ka 30th April 2019 wa da kem yaki tiar Stent, Pacemaker wa kiwi ki Implant ka Sanjo pharmacy, ka Cardiology Department da sdang ko wow pynemkaam daki Stent wa kiwi ki tiar naka AMRIT Pharmacy deiwa tuklar ka Meghalaya High Court, tangwa ki Pacemaker da pteiñ wow chim yaki na ki bru samen wa em cha baar ka NEIGRIHMS kiwa ym toh ki Pharmacy kiwa da tipmit kiwa da yoh bor.
Yaka Cath Lab da booh hei lut wa T. 10 klur wei da pynlut T. 25-26 lakh man ka snem yow pynbiang pyndap yaka. Wei da em leh sa kawi ka Cath Lab (Mobile Lab) kawa ym em pynemkaam, wei hawa chna ya kani ka Cath Lab sih sih wot ko. Wei ini waroh toh wa da chna yow myntoi ki paidbah tangwa kattæ leh ki paidbah dang hap ki wow su hei dor wa syad palat yei dor yaw, pynkut ka kyrwoh na u Dr. DM Thappa uwa man katni kam u Professor Senior Scale, Dermatology and STD Department, JIPMER, Puducherry, India.
