Kam u PN Syiem wow yoh i kyrchaan na waroh ki party wow jied ya u kyrtong na Ranikor

Shillong: I thylli noh ka chuki MLA ha Ranikor da pynkhih khohreh ko ya waroh ki seiñ saiñpyrthai ha ka jylla wei kamjooh ki kyrtong kiwa jooh yakhun ya ki Election cha ka Yunng Dorbar chna aiñ ka jylla.

Ini i lait ka kaam MLA ha Ranikor da ktik ko leh ya u Chairman ka People’s Democratic Front (PDF) uwa man leh u MLA warim ka Mawsynram uwa da rem noh ha ka Election uni u snem, u Pynshngain N Syiem.

Neiliang u Pynshngain ynne ka sngi da pynlang u ya kiwa kyrchaan yong ki Party waphær waphær na Ranikor wow jied ya u kyrtong wa hunlang wow yakhun ha ka chaap Mombati.

Hawa klam wa kiwa pathai khubor u Pynshngain da kam u wa kiwa boon kiwa kyrchaan yong ki Party wa kynthup na ka NPP, BJP, UDP-HSPDP, Congress wa kamjooh ka PDF kiwa da mynjur wow pynieñ du uwi u kyrtong ha ka Election chiteiñ samoi ha Ranikor u wow man leh na ka Party PDF.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Da ong u wow yoh ya u kyrtong wow hunlang daw pynman leh ya ka yalang ha soo tylli ki thaw wa kynthup ha Rangthong ha ka 3 tarik Naisaphra ha Wahkaji ha ka 6 tarik ha Nongjri wei kawa khaddooh u man ha Ranikor wei u rai noh ya u kyrtong ha katai ka sngi.

U Pynshngain da pdiang u leh wa man u kam u kyrtong wa waroh ki ya kwah ki, tangwa da ong u wa ka rai wa khaddooh u chim ha ka yalang ha Ranikor.

Da ong u wa ka Ranikor ka emkaam ko ya uwa mihkhmat wa thymme neibynta wow pynsmat u wanrah ya ka roi ka paar ha ka thaiñ neibhah hadooh katni ka Ranikor ka dang chah ieh ko chadien ha kiwa boon ki liang, wa kynthup ki sarok, ka puræ puthi, ka chait ka khiah wa kiwi ki kaam pynroi.

U Chairman ka PDF da klam skem u wa kiwi ki Party ym pynyieñ kyrtong ki ha ka Election chiteiñ samoi ha Ranikor neibhah kwah ki ya u kyrtong wa hunlang. Da kyntait u wa u MLA warim da man u u kyrtong wa kyrchaan da ka NPP neibhah wa ka party ha katai ka Constituency da piah ko arliang wei boon na kiwa yahkhmat kwah ki ya u kyrtong wa hunlang.

Heiyatoh wa i ong u President ka UDP, u Dr. Donkupar Roy wa ka Party u pynyieñ da u kyrtong wa man wa ar ha ka Election MLA wa da dep u Pius Marwein, neiliang u PN Syiem da ong u wa lada man ko kamtæ ka UDP ym kwah ko wow wanrah ya u kyrtong wa hunlang kamwa da thai ka sur u paidbah.

Da kyntu u ya ka UDP wow bichaar biang ko ya kani ka rai wow pynyieñ kyrtong wei wow emlang wa u kyrtong wa hunlang, heijooh i por da ong u wa hadooh katni ka yaklam dang lai ko chakhmat wa kiwa yahkhmat ka UDP wei da kyrmen wow yoh ya ka yakrehlang ha kani ka Election ha Ranikor.

Da kyntah u leh ya u MLA warim u Martin M Danggo wa hadien wa man u kam u MLA la 20 snem wa ymye u wow wanrah ya ka Civil Sub-division, wei da yoh u yeini deiwa ieh noh ya i kaam kawa ymye u pdaing wei da pynrap u leh wa i e ka sorkar jylla wa yahkhmat da ka NPP wow yoh ya ka Civil Sub-division ym krehkaam ko ha ka Election ha Ranikor.