June 28, 2018

Pyndep ka kur Dkhar ya ka lehniam ha Tpep Thang Sati Kur Dkhar Jowai

Advertisement ad1

Jowai: Ka kur Dkhar Jowai ha kani ka 28 tarik uni u bnai da chim ko ya i bynta wow pyndep yaka lehniam ha kawi naka thaw wa kyntang kawa yah nadooh u warim wajah kawa em ha nan Kasari Park wa tip kam ka Tpep Thang Sati Kur Dkhar Jowai.

Ya kani ka lehniam da jooh pynman khlieh u snem daka Kur Dkhar hachwa ka lehniam Behdieñkhlam kam ka dak wow pdiang yaki sangia saret, wei wow e ka ngooh ka dem yow theh ki i kyrkhu kyrdoh khamtam ya kiwi dang em ha sla khyndaw pyrthai yow yoh ki yei chait i khiah i roi i paar wei yow ye u pyndep yaki kaam ki jam.

Advertisement ad1

Ha kani ka lehniam da embynta ki bru waheh ka kur wa kynthup ya u Chairman u Dawan Dkhar, u Secretary u Chanlok Dkhar uwa da e leh yaka ngooh ka dem natlor ki khon khynroo khyllood ki manbei kiwa man kam ka Kchu ka Siang.

Hei yaklam wa u Chairman ka Kur Dkhar u Dawan Dkhar da khana u wa da khut ya kani ka thaw kam ka Tpep Thang Sati, toh wa haki por nachwa ha kani ka thaw da thang yaki khon ka kur kiwa dang sati hok wei man khooid, katwa ka nan wa em hachrooh ka thaw thang sati won nachwa man ko ka nan wa khian bha wei hawa pyndep yaka niam, ka met yong kiwa yap emkaam yaka um wa mih na kani ka nan yow pyndep yei lehniam.