Da u Shimphang Lyngdoh
Na yung na sem deiwa toh sneiñ toh kroo,
Luti wa bha ka bei u pa wa pynyoo;
Bood thij pa thij ham lai bakla,
Yow ye u im deiwa miat wa bha.
Yieñ joit dei dap chynrang kynthai
Jar jiar ka hok u khih u kamai
Yei adnood bichni booh chwa charood,
Pait jar i bynta ham pyntam pood.
Lyngkor wa khia u kit u bah,
Kamwa pynyoo nongmuna ya ki khynnah;
Ka mynried wa bha chong ko ha ki khynroo,
Mih chakhmat jar i sap u pynyoo.
Ham khwan ham khapnap ha i buit i bor,
Leh dei mon sñiawbha ym toh dei pynbor;
E kyllooid katwa ye wa lah cha ka imlang sahlang,
Yoh u ku chooh chooh ka jaitbru chaphrang.
Kiwa chong cha kdong khlem mih pyrthai,
Ki stat samen ki ksoh chang kwai;
Harood tpai wa broh ya ki kynthai khynnah,
Ha khmat u paidbah toh ki tieñslah.
