Kiwa wan paitke kiwa na baar ri ym chah ya ki wow wan ki cha ka Olympic Games kawa daw pynman ha Tokyo, Japan kam chibynta wow pynkhian yei rukom pynman ya ka.
Da em kamwa 600,000 tylli ki Olympic Tickets kiwa da thied da ki bru wa na baar ri daw hap pynuiñ biang yaka bai thied kamjooh ya ki 300,000 tylli ki Ticket neibynta ka Paralympic, da pyntip u Toshiro Muto, Chief Executive ka Tokyo 2020 Organising Committee tangwa ym em ong u katwon poi ka poisa wa hap pynuiñ.
Ka Tokyo Olympic Games kawa da toh u man ynnin u snem da hap kyrriah noh neidaw wa em ka khlam COVID-19 kawa da rah noh cha uni u snem nadooh ka July 23-August 8, katwa ka Paralympics nadooh August 24-September 5.
Daw chah du ya kiwa na baar kiwa embynta lang ha ka Olympics wa kiwa paitke kiwa na Japan donhi.
Da pyntip u leh wa yaka bai Hotel kiwa wan na baar ri ym pynuiñ deilang waka bai Ticket deiwa phah leh ya kiwa wan chimbynta wow pynduna ya ki bru wa yahlang ki.
Ini waroh da ktah ko yei thong wow pynku ya kiwa wan chapoh ka ri Japan iwa da yooluti bha wa daw pynku yaka kaam uiñke suwari.
Da pyntip wa daw chim yaka rai wa katwon ngut ki bru kiwa napoh ka ri kiwa daw chah wow lai paitke.
