Jowai: U MP ka Shillong u Vincent H Pala, ynne ka sngi da wai u ya u moo-yurim wow chna ya ka Second Phase ka yungskur Loomiongkjam Higher Secondary School ha ka yalang wa pynman ynne wei da pynman leh ya ka pynkup burom ya ki khynnah puræ kiwa da pass bha na ka chnong kawa tip kam ka Fifth Loomiongkjam Meritorious Award heiwa da emlang leh u Wailadmiki Shylla, MLA wa u A. Andrew Shullai, MDC, u Puramon Kynjing, Dolloi ka Jowai Elaka wa ki dkhot ka chnong.
Neiliang ka chnong da e leh ya ka dorkhat cha u MP, MLA wa u MDC wow paan yarap poisa wow chna ya kani ka yungskur.
Ka Soneeta Passah kawa man kam ka Head Teacher ka Pohmusiang Upper Primary, School Loomiongkjam, Jowai da khana ko wa ya kani ka skur da seiñ ya ka ha u snem 1863 kam ka Lower Primary School kawa pynlai da ki Welsh Missionary deilang waka Iongpiah wei ha u snem 1940 da ekti noh ya ka cha ka Loomiongkjam wei katni da em ko hadooh Class VIII.
Chwa wow pynkup burom ya ki khynnah puræ, neiliang u Womlin Pakyntein uwa man kam u Executive Member ka Loomiongkjam Dorbar Chnong da ong u wa sñiawsih u yoo wa ha uni u snem da em du arngut donhi kiwa chah pynkup burom heiwa ha ki snem nachwa da dap ki thaw chong du kiwa chah pynkup burom wei da pynchlur u ya kiwa lai skur wow man ki kiwa minot wei ymtoh u pynlut por wow pait TV wei ki bei ki pa leh toh u man ki kiwa kitkhlieh wei du i krehchitom donhi wow ye u wanrah ya ka mynried wa tyrchaaiñ.
Kiwa chah pynkup burom ha kani ka sngi toh u Dathrangki oo Pakyntein uwa da yoh 87.33% wa u Lakhon Pakyntein uwa da yoh 93% ha ka Class XII.
U Vincent uwa man kam u kongsan ha kani ka sngi da ong u wa ka imlang sahlang kawa tip u burom ya ki waheh kiwa yatylli donhi kiwa ye u ku chakhmat neibhah ha ka pyrthai katni da em kiwa kwah wow pynpsiah ya ki drugs u pynngat ya ki khynroo ha ki jait dih pynmuaid kam i kiad wei da em ki jylla kiwa da hiar du na kini ki daw.
Da ong u leh wa emkaam leh ya kiwa sikai kiwa tipbru tipblai wei da yaroh u leh ya ka chnong kawa da emlang wa kani ka skur la 155 snem wei da chna da tei ya ka yungskur da i bor yong ki wei da kular u leh wow yarap poisa ym du naka MP Scheme kamjooh leh na ka CSR Scheme ka poisa wa da pynkit ha ki Company wow su kylliang ki cha ka imlang sahlang.
Heijooh i por da ong u leh hanlada ha uni u snem em du ki ar ngut kiwa chah pynkup burom ymphær i neibah ha kiwa boon ki por emkaam du uwi namo ar ngut wow pynkylla ya ka pyrthai.
Neiliang u Wailadmiki won da ong u wa deiwa ya krehlang u MP, MLA wa u MDC daw ye u yarap tangwa heijooh i por leh da pynchlur u ya ka chnong wow lai ki cha khmat neibhah ka sorkar ymye ko u e yarap ya kawi pa kawi ka skur wei i kreh chitom donhi wa ye u pynpoi cha kawon kawon ka thong.
Neiliang u Andrew won da pynchlur u ya kiwa lai puræ wow pyrkhat ki wow man kam kiwa e kreh ya kiwi neibhah kanti i kreh toh iwa eh bha u yoh wei da yooluti u leh wa kani ym man ko kawa eh neibhah kani ka chnong da pynmih ko boon ki bru wa stat wei neiliang yong oo daw yarap u katwa ye ya ka chnong.
Neiliang ka NYPF ka Youth Wing ka NPP da e ki T. 10,700 kam wow yarap wow chna ya kani ka yungskur.
Discussion about this post