Dr. R. Phawa kam uwi na kiwa chong chnong wa lai wa wan wa yah kari man-i-por da ong u wa ka jylla Meghalaya kawa chi troh donhi wa ki Toll Gate chi khoh, ki sarok won da man ki la kam ka thaw sum ki sniang.
Da ong u ka jylla yong i man ko kawa kyrkhu da u Blai daka rymaw wa miat kawa da yaroh da kiwa boon kawa heh du kamwa 22,700 sq.km tangwa ki Toll Gate won hadooh wym ye de u lakha kiwa da khrong dan, tangwa ya u sarok won uwa man kam u budloom yei roi yei paar la ha sor næ nongkyndong. Tangwa da sñiawsih u ong u pait wa kat u sarok NH06 ter ter toh uwa sadu i thlu wa heh wa heh lakam ki thaw sum ki sniang hadooh wow yah kari leh ym tipsap de.
“Lada yieñ da sahkut da chah tyrrah ka kari, lada lai daw haap cha thlu, u chah syngkhood u kpoh ki kari. Cheiwon wiar kiwa sumaar wa pait ya ki sarok? Cheiwon wiar kiwa chong ha ka chuki? Yei ye u kynnoh i? Ya kiwa jied næ ya kiwa chah jied?? Aa phi kiwa em hei bor kiwa tohsap u pait u chna sarok sñiawbha ham pynbaad cha ka bei rymaw. Lada slap næ chit u sarok cha i da sih bait lakam wym em poisa de,” da ong u Dr. Phaw.
Da ong u leh wa kat ya u sarok National Highway dang yoh u sih, ym tip de katwon cha ki sarok nongkyndong. Da kylli u ya kiwa em hei bor wa tip de boi ki lai ki dei suiñ ma-ai?.
“I ki wym yoh laad u hær wym yoh yei naam VIP-VVIP pyrkhat lang ya i leh. Cheiwon wiar ka poisa bai dan wa lum ki Toll Gate? Dang mut O jan yow bha u miat u sarok kat dang boon ki Toll Gate kat u yoo mar dei khangtleiñ, lum ya ka poisa paidbah tip cheiwon lithap ki ka.”
“Ki Toll Gate man ki kam ki thlen kjit snam hanpaya, ki wym rah wym e myntoi ya i. Sa du ki thlu suda tymbud u sarok National Highway. Boon i jia wa sñiawsih du neidaw wa sih ware u sarok. Yoo dooh burom hawa pait kamni ya u sarok National Highway hapyrdi i boon tylli ki khyrdop khrong dan katwa u surok won da yoosarom wow pait.”
