Kem ka Enforcement Department ya Rs. 123 klur ka poisa wa thok chukor ki App ka China na ki paidbah ka India

Ka Enforcement Directorate ka sorkar pyrdi ynne da pynsangeh ko yei krehkaam ki Bank Account wa em Rs. 123 klur hadien wa lai kynreh ha Mumbai, Chennai wa Kochi kam chibynta ka takit yei pynlai pynwan yaka poisa khlem da bood ya ki kyndon aiñ wa da poi lyngba ki App wa pynkrehkaam da ka China yow e ram wei wow yathong heiwa da em boon ki bru wa chah thok chah chukor.

Yeini i lai kynreh da pynman haka 23 wa 24 tarik uni u bnai pyrchah ya kawi ka Company wa tip kam ka NIUM India Pvt Ltd wa ki Director ko wa em ha Mumbai, neitæ ka Xoduz Solution Pvt Ltd, Vikrah Trading Enterprises Pvt Ltd, Tyrannus Technology Pvt Ltd, Future Vision Media Solutions Pvt Ltd, Aprikiwi Solution Pvt Ltd wa em ha Chennai wa u Raphael James Rozario wa em ha Kochi.

Waroh ki thaw wa lai kynreh da em ki 10 tylli ha Mumbai, Chennai wa Kochi.

Ini i takit da sdang i hadien wa yoh boon tylli ki FIR kiwa da e ha ki pulit ka Kerala wa Haryana kiwa da ong wa da chah thok ki ha kiwa boon ki App kiwa da tyrwa wow e ram wei wow yathong poisa lyngba ki Gambling Apps ha ki Mobile Phone wei kini toh kiwa da pynlai da ki Company wa na China.

Related posts

Pteiñ i chah tooh ki thuk-thuk ha kylleiñ ka Meghalaya

December 16, 2024

Chah tooh sa kawi ka thuk-thuk ha Jowai

December 15, 2024

Ka poisa wa yoh na kini ki App da pynlai cha ki Bank Account wa chna hei pyrtuid ki Company kiwa yarap u leh yeini deiwa pynemkam da kiwa boon ki App wa hoi u su poisa.

Hadien ini da pynlai yaka poisa cha ki Company wa em du i pyrtuid cha baar ri kam ha Singapore kiwa da chna Receipt wa ki Bill wa boon jiat yow pynyoo neiwon yoh ki ya kani ka poisa kam wa dai ki ya ki Software wa kiwi kiwi de cha ki Company wa em ha India.

Ya kini ki Receipt, ki Bill da pynmih da ka Company wa tip kam ka NIUM Singapore Pvt Ltd. (Singapore) kawa em chnat ha India kawa tip kam ka NIUM India Pvt. Ltd., kawa da kam wa da thied ki ya kini ki mar.

Ya ka poisa wa phah na India da ong wa toh neibynta wow thied ya kiwa boon ki tiar ki tar kawa da thap hapoh ki Virtual Wallet kani ka Company wa em ha Singapore.

Deiwa leh ki kamni da lait ki nei tip ka Bank kamjooh ki chnat sorkar wa toh u pait yeini. Ka poisa wa Rs. 123 klur toh kawa da suba wa da yoh yow leh yeini i kaam kawa da neh ha ki Bank Account ka NIUM Indian Pvt. Ltd. Kamtæ da ksoh ka yow lait noh u sai ka.