U SP ka East Jaiñtia Hills District da pyntip u wa ha ka 19 tarik uni u bnai da pyntip da uwi uwa chong chnong ka thaaiñ Lumshnong wa da yoh Phone na uwi u bru wym tipmit u uwa da dawa poisa deiwa maham pynyap lada ym su u.
Kamtæ ha ka 21 tarik uni u bnai ki pulit da lai bood ki ya uni uwa chah dawa poisa heiwa heipor kamwa 3:00 waje i sngi hadien wa pynyieñ kari u ha Dosti Hotel wa em ha Ladrymbai, da wan syndet ar ngut ki bru wa psiah syndet chapoh ka kari uni u bru, ki pulit deiwa suba wa da em iwa jia da lai kem ki wut-wut ya kini ki bru.
Hawa takit ki ya kini, da phla ki wa da lai chim ki ya kani ka poisa neibynta uwi u bru wa da tipmit ki lyngba ka Facebook. Deiwa tip yeini, ki pulit ha kani ka 22 tarik heipor kamwa 6:00 waje i miet da lai kem ki ya uwi u bru wa tip kam u Issei Sungoh (29 snem) na thaw sah u wa em ha Dkhiah East (Ladsutnga).
Da chem wa uni toh u bru uwa da Phone wow dawa poisa dep te pynyatoh lok u wa kini ki ar ngut ha Facebook wei da phah u ya ki wow lai chim ya kani ka poisa wa da dawa u.
U Issei Sungoh toh uwa da dep chah kem nachwa ha ki pulit ka East Jaiñtia kam uwa emkti hei tympdung Bomb ha Khliehriat Police Reserve ha u snem 2021 tangwa da pnylait ka yung bichaar oo deiwa su jamin.
Heiyatoh wa ini da pynngat ya kini wa emkti hapoh ka Section 386/120 ka IPC wei ka takit dang lai ko chakhmat.
Deilang wa u Issei da kem leh ya le ngut kiwi kiwa kynthup ya u Darius Pakem (19 snem) uwa na Moolaitbri Sumer, East Jaiñtia Hills katwa kiwi ki ar ngut ym em khana pyrtuid neidaw toh kiwa dang hapoh 18 snem.
Discussion about this post