Jowai: Ka Special Investigation Team (SIT) wa da thung neibynta i chah khayi wei chah pynemkaam bakla ki khynnah kynthai hapoh West Jaiñtia Hills, ynne u DSP (HQ) MJ Marngar uwa khlieh ya ka SIT da pyntip u wa da kem ki pulit sa 12 ngut kiwa emkti wow slaitbor ya kini ki khynnah wa hapoh 18 snem i rta.
Da ini i kem ki pulit waroh kiwa da chah kem kattu wa emkti wow slaitbor wei wow khayi ya kini ki khynnah da em ki 24 ngut.
Chooh chooh da ong wa uwi na kini kiwa da chah kem toh u pulit (MLP) Inspector uwa da chongngiah, uwi toh uwa na Khliehriat, wei da em leh kiwa dang kreh ha ki chnat sorkar.
Heiyatoh wa i pyrtuid yong kiwa da chah kem, neiliang u SP ka District, u Lakador Syiem da ong u wa ya i pyrtuid yong ki ympu ye u pynmih neidaw wa ka takit dang lai ko chaphrang wei lada pynmih yei pyrtuid yong ki kiwi kiwa emkti ha kani ka kaam ye ki wow yut neibhah kamwa jia ini wa dadep da em kiwa emkti kiwa da yut na ki pulit.
Da pynrap u leh wa ka takit dang lai hi ko chaphrang wei daw pyntip paidbah ya ki bru kiwa emkti ha kani ka kaam.
Chooh chooh da ong u wa ya kiwa da chah kem da pynngat ya ki hapoh ka kyndon aiñ ka POCSO.
Discussion about this post