Ki pulit da kem noh ki ya ki soo ngut kiwa chong chnong ka Meghalaya wa kynthup ya kawi ka manbei, hadien wa hadooh 15 Kg u bhang da khyrrup na ka kari ka yong ki ha Jalpaiguri ha i miet ka yong ka 25 tarik.
Katkam ka khubor na ki pulit, da pyntip wa da yoh yutip wa da em i khayi pyrchah ya ka aiñ ya ki jait dih pynmuaid cha Bihar na ka thaaiñ mihsngi. Kamtæ ki pulit na Kotwali da yang khap ki yow yoh ksoh ya ka kari ha u sarokbah NH-27 ha Gosala More, kawa da man khapsor wa ka Jalpaiguri ha i por kamwa 9:00 waje i miet.
Hadien wa da ksoh, ki pulit da pynman yei kynreh ya ka kari wei da chem hadooh 15 kilo u bhang wa da song bha.
“Kani ka kari kawa da yoh wow ksoh toh kawa em ya u Registration Number na Meghalaya. Ha ka takit wa da sdang, da chem wa ya u bhang da pynkit na i thaw wa na Assam wei da thmu wow khayi tooh cha Bihar. I dang pyrchang i wow thooh wa lada kiwa chah kem toh ki kiwa chong chnong ka Meghalaya, lane toh du kiwa rah lane emkti ki hei khayi drug,” da ong u sahep pulit.
Katkam wa pyntip ki pulit, da ong wa i dor yong uni u bhang wa da yoh kem man u kamwa T. 75,000.
Da pyntip leh wa ha ka 26 tarik uni u bnai, ya ki soo ngut kiwa da yoh kem, kitæ u Sanjib Roy, u Jagmohan Roy, u Vicky Kunar wa ka Bina Ranglihat da lai rah hakhmat ka yung bichaar, heiwa da e bor wow kset (Judicial Custody) neibynta 14 sngi.
