U SP ka East Khasi Hills District ha ka kyrwoh wa da phah u, da pyntip wa ha ka 16 tarik uni u bnai heipor janmiet da chah lute ka Meghalaya Rural Bank, Ksehbilat Branch ha ki arnut wa rah tiar yasiat kiwa da sap Mask heipor 5:15 wa 5:30 heipor wa em du ka Branch Manager donhi hapoh ka Bank.
Kini ki arngut da khang ki ya ka Bank napoh wei da pynbor ki ya ka Branch Manager wow wai ya ka kamra booh poisa namo ka Strong Room tangwa neiliang yong ka ym em wai ko, kamtæ kini kiwa lute da tooh ki T. 10,000 na ka Branch Manager deiwa rah leh ya ka DVR wa ki CCTV yow lait wow tipmit ya ki.
Hadien ini da e FIR hajrong ini wa jia da u Regional Manager, Meghalaya Rural Bank ha ka 17 tarik uni u bnai ha ka Madanrting Police Station kawa da takit da u SI S. Kharbuli uwa da leh smat yei kaam heiwa da tipmit ya kiwa emkti.
Kamtæ hei miet ka 21 tarik uni u bnai, da lai kynreh yei yung yong uwi na kiwa suba iwa em ha Pomlakrai, Mawtharia heiwa da kem ya u Heavy Jones Kurkalang (25 snem) uwa da phla wa emkti ha ini i kaam wei da chem leh ya ka tiar wa pynemkaam wa murieh hapoh tusok.
Deiwa yah u Kurkalang, da kem ya u Shiningstar Wahlang (23 snem) na Wahkdait, Dong Pata, Madanrting Block-G. Katwa ya ka DVR wa rah ki da chem na ka nan wa em ha Wahsnait.
Ka takit dang lai ko chakhmat yow chem lada dang em kiwi de kiwa emkti ha ini i kaam.
